ᓄᓇ ᐊᐅᓚᔾᔭᑦᑕᐅᓂᖓᓄᑦ ᖁᕕᐊᓲᑎᖃᕐᓂᖅ ᐊᑐᖅᑕᐅᒋᐅᖅᑐᖅ $83.7M ᐃᓪᓗᓕᐅᕈᑎᑦᓴᒥᒃ ᐊᖅᑯᓴᕆᐊᖅ (ᑕᐃᔭᐅᖃᑦᑕᖅᓯᒪᔪᖅ ᓄᓇᕗᒻᒥ ᒪᒥᓴᕐᕕᒃ) ᐃᖃᓗᓐᓂ
ᑐᓴᕋᑦᓴᙳᖅᑎᑕᐅᔪᖅ
ᐃᕐᖐᓐᓇᖅ ᓴᖅᑭᖅᑕᐅᔭᕆᐊᓕᒃ
ᓄᑖᖅ ᐃᓄᐃᑦ−ᓴᓇᒻᒪᓕᐅᖅᓯᒪᔭᖓ ᐊᔪᓕᖅᓯᒪᔪᓄᑦ ᖁᐊᖅᓵᓇᖅᑐᑰᖅᓯᒪᔪᓄᓪᓗ ᒪᒥᓴᕐᕕᒃ ᓄᓇᕗᒻᒥ ᑲᔪᓯᑎᑦᓯᔪᖅ TRC ᐊᐅᓚᔾᔭᐃᒋᐊᕈᑎᑦᓴᐅᖁᔨᓯᒪᔭᖓᓂᒃ #21
ᐊᐅᒡᒍᓯ 14, 2023 — ᐃᖃᓗᐃᑦ, ᓄᓇᕗᑦ — ᓄᓇᕗᑦ ᑐᙵᕕᒃ ᑎᒥᖓ, ᓄᓇᕗᑦ ᒐᕙᒪᖓ, ᓄᓇᖃᖅᑳᖅᓯᒪᔪᓄᑦ ᐱᔨᑦᓯᕈᑏᑦ ᑲᓇᑕᒥ
ᖃᓪᓗᓈᕈᖅᑎᑕᐅᒐᓱᐊᖅᓯᒪᓂᕐᒧᑦ ᖁᐊᖅᓵᓇᖅᑐᑰᖅᓯᒪᓂᖅ ᐃᑎᔪᐊᓗᒃ ᐱᔭᕐᓃᑦᑑᓪᓗᓂ, ᐊᑦᑐᐃᓯᒪᔪᖅ ᑭᖑᕚᕆᓂᒃ ᐊᒥᓱᓂᒃ. ᒪᒥᓴᕐᕕᑖᕐᓂᖅ ᖃᓂᑦᓴᓂᑦᓴᒥᒃ ᓄᓇᖓᓄᑦ ᑐᙵᕕᓕᐅᖅᓯᒪᔪᒥᒃ ᐃᓄᐃᑦ ᐱᖅᑯᓯᖓᒍᑦ ᐊᑐᖃᑦᑕᓲᖓᒍᓪᓗ, ᒪᒥᓴᖅᐸᓪᓕᐊᒍᑕᐅᒍᓐᓇᖅᑐᖅ ᓄᓇᓕᓐᓄᑦ, ᐃᓚᒌᓄᑦ, ᐱᖃᓐᓇᕇᓄᑦ ᐊᒻᒪᓗ ᓇᒡᓕᒋᔭᖏᓐᓄᑦ.
ᐅᓪᓗᒥ, ᓄᓇᕗᑦ ᑐᙵᕕᒃ ᑎᒥᖓᓂ (ᑐᙵᕕᒃ) ᐊᖓᔪᖅᑳᑉ−ᑐᒡᓕᐊ, ᐹᓪ ᐃᕐᖓᐅᑦ, ᐊᒻᒪᓗ ᐃᓄᓕᕆᔨᑐᖃᒃᑯᑦ ᒥᓂᔅᑕᖓ ᐹᑎ ᕼᐊᔾᑐ, ᐊᒻᒪᓗ ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᓄᓇᕗᒻᒥ ᒥᓂᔅᑕ ᔮᓐ ᒪᐃᓐ, ᓄᓇᒥᒃ ᐊᐅᓚᔾᔭᐃᖅᑲᐅᔪᑦ ᐃᓪᓗᓕᐅᕐᕕᐅᓛᕐᓂᐊᖅᑐᒥᒃ ᓇᓗᓇᐃᕆᓪᓗᑎᒃ ᑕᐃᔭᐅᔪᒥᒃ ᐊᖅᑯᓴᕆᐊᖅ ᐃᓂᒋᒍᒫᖅᑕᖓᓂᒃ ("ᓄᓇᖓᓂᒃ ᐊᐅᓚᔾᔭᐃᓪᓗᑎᒃ") ᓇᓗᓇᐃᖅᓯᒍᑎᖃᖅᑐᑎᒃ.
ᐊᖅᑯᓴᕆᐊᖅ ᐊᑭᓕᒃ $83.7−ᒥᓕᔭᓂᒃ ᒪᒥᓴᕐᕕᑦᓴᖅ, $42.1−ᒥᓕᔭᓂᒃ ᑮᓇᐅᔭᓕᑕᐅᓯᒪᔪᖅ ᑲᓇᑕ ᒐᕙᒪᖓᓂᒃ ᐊᒻᓗ $41.6-ᒥᓕᔭᓐ ᓄᓇᕗᑦ ᒐᕙᒪᖓᓂᒃ. ᐃᓚᖃᖅᑐᓂ, ᑐᙵᕕᒃᑯᑦ ᑐᓂᓯᒪᔭᖏᓐᓂᒃ $5-ᒥᓕᔭᓐ ᑐᕌᖓᓂᐊᖅᑐᓂᒃ ᐃᓘᓐᓈᒍᑦ ᐊᑭᖏᓐᓂᒃ ᐱᓕᕆᐊᒧᑦ ᐊᒻᒪᓗ $11.8-ᒥᓕᔭᓐ ᒪᑭᒋᐊᖅᑕ ᐃᓄᐃᑦ ᐱᓕᒻᒪᓴᕐᓂᕐᒧᑦ ᑯᐊᐳᕇᓴᖏᓐᓂᒃ ᐃᓕᓴᐃᒍᑎᑦᓴᓂᒃ ᐃᓄᓐᓂᒃ ᐃᓅᓯᓕᕆᔨᐅᓂᕐᒥᒃ, ᓄᓇᖃᖅᑳᖅᓯᒪᔪᓄᑦ ᐱᔨᑦᓯᕈᑏᑦ ᑲᓇᑕᒥ ᑐᓂᓯᓂᐊᕐᒥᔪᑦ $9.7-ᒥᓕᔭᓂᒃ ᐊᕐᕌᒍᑕᒫᑦ ᑮᓇᐅᔭᓖᖃᑦᑕᕐᓗᑎᒃ ᑐᕌᖓᔪᓂᒃ ᐊᑭᓕᖅᓲᑎᑦᓴᓄᑦ ᐊᐅᓚᔾᔪᑎᑦᓴᖏᓐᓄᑦ ᒪᒥᓴᕐᕕᐅᑉ.
ᑖᓐᓇ ᐊᑐᖅᑕᐅᒋᐅᖅᑐᖅ ᑮᓇᐅᔭᓖᒍᑕᐅᔪᖅ ᑲᔪᓯᑎᑦᓯᔪᖅ ᓱᓕᔪᒥᒃ ᓴᐃᒻᒪᖃᑎᒌᓐᓂᒥᓪᓗ ᑲᒥᓴᒃᑯᑦ (TRC) ᐊᐅᓚᔾᔭᐃᒋᐊᕈᑎᑦᓴᓕᐊᕆᓯᒪᔭᖓᓂᒃ ᓈᓴᐅᑖ 21 ᖃᐅᔨᒃᑲᐃᔾᔪᑎ ᒐᕙᒪᑐᖃᒃᑯᓐᓂᒃ ᒪᑭᒪᔾᔪᑎᑦᓴᑖᖅᑎᑦᓯᖁᓪᓗᒋᑦ ᑮᓇᐅᔭᓂᒃ ᒪᒥᓴᕐᕕᓐᓄᑦ ᐋᖅᑭᒋᐊᕈᑎᑦᓴᓂᒃ ᑎᒥᒃᑯᑦ, ᐃᓱᒪᒃᑯᑦ, ᐃᑉᐱᓐᓂᐊᓂᒃᑯᑦ, ᐊᒻᒪᓗ ᑕᕐᓂᒃᑯᑦ ᐋᓐᓂᖅᑕᐅᓯᒪᔪᓂᒃ ᐃᓕᓐᓂᐊᕆᐊᖅᑎᑕᐅᖃᑦᑕᖅᓯᒪᓂᕐᓂᒃ, ᐱᓗᐊᖅᑐᒥ ᓄᓇᕗᒻᒥ ᐊᒻᒪᓗ ᓄᓇᑦᓯᐊᒥ.
ᐊᖅᑯᓴᕆᐊᖅ, ᑕᐃᒎᓯᖅᑖᖅᑎᑕᐅᓯᒪᔪᖅ ᐃᓕᖅᑯᓯᒃᑯᑦ ᐊᒻᒪᓗ ᐊᑐᖅᑕᐅᓯᒪᔪᓂᒃ ᖃᐅᔨᒪᔨᑕᑦ ᑲᑎᒪᔨᕋᓛᖏᓐᓂᒃ, ᐊᖅᑯᓴᕆᐊᖅ ᐱᕙᓪᓕᐊᑎᑦᓯᔩᑦ, ᐊᒻᒪᓗ ᐱᓕᕆᐊᓕᓐᓄᑦ ᖃᐅᔨᒪᔪᕐᔪᐊᓄᑦ ᓄᓇᕗᓕᒫᒥᒃ ᐱᓯᒪᔪᓂᒃ, ᐃᓄᒃᑎᑐᑦ ᑕᐃᒎᓯᖅ ᓇᓗᓇᐃᖅᓯᔪᖅ ᐊᖅᑯᓴᕆᐊᖅ ᑎᑭᐅᑎᒐᓱᐊᖅᑎᓪᓗᑎᑦ ᐅᐹᕆᔭᓐᓄᑦ ᐊᒻᒪᓗ ᓇᓗᓇᐃᒃᑯᑕᐅᓪᓗᓂ ᒪᒥᓴᕐᓂᒃᑯᑦ ᐅᑎᖅᐸᓪᓕᐊᓂᕐᒧᑦ ᐃᓅᓯᕐᓄᑦ. ᓴᓇᔭᐅᓂᖓ ᐊᖅᑯᓴᕆᐊᖅ ᑭᒡᒐᖅᑐᐃᒍᑎ ᓴᕐᖓᑎᑦᓯᓂᕐᒥᒃ ᓄᓇᕗᒻᒥ ᐃᓱᒪᒃᑯᑦ ᖃᓄᐃᙱᑦᓯᐊᕈᑎᑦᓴᓄᑦ ᐊᒻᒪᓗ ᐋᖓᔮᕐᓇᖅᑐᓂᒃ ᐊᑐᓂᕐᓗᖃᑦᑕᓂᕐᒧᑦ − ᐃᓚᒋᔭᐅᔪᖅ ᐃᓄᓐᓂᒃ− ᐋᖅᑭᑦᑕᐅᓯᒪᔪᒥᒃ ᐅᐃᕆᓯᒪᓇᖅᑐᓂᒃ ᖁᐊᖅᓵᓇᖅᑐᑰᖅᓯᒪᔪᓂᓪᓗ ᒪᒥᓴᕐᕕᒃ.
ᒪᒥᓴᕐᕕᒃ ᒪᒥᓴᕐᕕᐅᒍᓐᓇᖃᑦᑕᓂᐊᖅᑐᖅ ᐊᒻᒪᓗ ᒪᒥᓴᕐᓂᕐᒧᑦ ᐅᖑᒪᑦᓯᔾᔪᑎᑦᓴᓂᒃ ᑐᕌᖓᔪᓂᒃ ᐋᖓᔮᕐᓇᖅᑐᓂᒃ ᐊᑐᖃᑦᑕᓂᕐᒥᒃ ᐊᒻᒪᓗ ᖁᐊᖅᓵᓇᖅᑐᑰᖅᓯᒪᔪᓂᒃ ᐃᓄᓐᓂᒃ ᐃᓕᖅᑯᓯᒃᑯᑦ ᐱᖅᑯᓯᕆᔭᐅᔪᓂᒃ ᐱᖕᒪᕆᐅᑎᑕᐅᔪᓂᓪᓗ. ᐃᑲᔫᑎᑦᓴᑲᓐᓂᐅᓂᐊᖅᑐᑦ ᓄᓇᓕᑦᑎᒍᑦ ᐱᓕᕆᐊᖑᔪᑦ ᒪᓂᒪᑎᑦᓯᓂᒃᑯᑦ ᓄᓇᓕᐊᖃᑦᑕᓂᕐᒥᒃ ᒪᒥᓴᕐᓂᕐᒧᑦ ᐊᐅᓪᓚᖅᓯᒪᖃᑦᑕᕐᓗᑎᒃ ᐊᒻᓗᒪ ᐊᓯᖏᑦ ᓄᓇᓕᑦᑎᒍᑦ ᐃᑲᔫᑎᑦ ᐱᕙᓪᓕᐊᑎᑦᓯᒍᑎᑦᓴᑦ ᐃᓕᖅᑯᓯᒃᑯᑦ ᓴᕐᖓᑎᑦᓯᕙᓪᓕᐊᓂᕐᒥᒃ, ᐊᒻᒪᓗ ᐱᕙᓪᓕᐊᑎᑦᓯᓂᕐᒥᒃ ᐃᓄᓐᓂᒃ ᐃᖅᑲᓇᐃᔭᖅᑎᖃᖃᑦᑕᓂᕐᒥᒃ ᐊᐅᓚᑦᓯᔪᓂᒃ ᒪᒥᓴᕈᑎᓂᒃ ᐅᖑᒪᑦᓯᔾᔪᑎᑦᓴᓄᑦ.
ᐸᕐᓇᑕᐅᓂᖓ ᐃᓪᓘᑉ ᐃᓂᑦᓴᖓ ᓄᓇ ᑲᒪᒋᔭᐅᕙᓪᓕᐊᒌᖅᑐᖅ, ᓴᓇᔭᐅᕙᓪᓕᐊᒍᒫᕐᓂᐊᖅᑐᖅ ᐅᑭᐊᑦᓵᖅ 2023. ᒪᒥᓴᕐᕕᒃ 24-ᓂᒃ ᐃᓪᓕᖃᕐᓂᐊᖅᑐᖅ, ᐊᒻᒪᓗ ᓄᓇᓕᓐᓃᙶᖅᑐᒥᒃ ᐸᖅᑭᔭᐅᕕᖕᒥᒃ, ᐃᓚᒋᔭᐅᓗᑎᒃ ᒪᒥᓴᕈᑏᑦ ᓯᖓᐃᔪᓄᑦ ᓇᔾᔨᐊᖏᑦ ᐃᒥᐊᓗᒻᒧᑦ ᐃᑦᑕᑦᑕᐅᓯᒪᖁᓇᒋᑦ. ᓂᕆᐅᒋᔭᐅᔪᖅ ᐱᐊᓂᒃᓯᒪᒐᓚᓛᕆᐊᖓ ᑏᓰᒻᐱᕆ 2025.
ᐅᖃᐅᓯᐅᓯᒪᔪᑦ
"ᐊᖅᓴᕆᐊᒃᑯᑦ, ᐃᓄᐃᑦ ᐃᑲᔪᖅᑕᐅᑲᓐᓂᕈᓐᓇᕐᓗᑎᒃ ᒪᒥᓴᕐᓂᕐᒥᒃ ᐊᑦᑐᐃᓯᒪᓂᖓᓂᒃ ᐃᓕᓐᓂᐊᕆᐊᖅᑎᑕᐅᓪᓗᑎᒃ ᐊᐅᓪᓚᖅᑎᑕᐅᖃᑦᑕᖅᓯᒪᒧᑦ ᐊᒻᒪᓗ ᑭᖑᕚᖏᑦ ᖁᐊᖅᓵᓇᖅᑐᑰᖅᓯᒪᔪᑦ ᐃᓅᑦᑐᐊᓂᖅᓴᐅᓕᕐᓗᑎᒃ ᐅᑎᖅᑎᑦᓯᓂᒃᑯᑦ ᑎᒥᒃᑯᑦ, ᐃᓱᒪᒃᑯᑦ, ᐃᑉᐱᓐᓂᐊᓂᒃᑯᑦ, ᐊᒻᒪᓗ ᑕᕐᓂᒃᑯᑦ ᖃᓄᐃᙱᑦᓯᐊᑲᓐᓂᓂᕐᒥᒃ. ᐊᑐᐃᓐᓇᖃᕐᓗᑎᒃ ᓄᓇᒥᒃ ᐃᓐᓇᓂᓪᓗ, ᑎᒥᒧᑦ ᐊᑐᕐᓂᓕᓐᓂᒃ ᓂᕿᑦᑎᓐᓂᒃ ᐊᒻᒪᓗ ᐃᓄᒃᑐᑦ ᐃᖢᐊᖅᓴᖅᑕᐅᒍᑎᓂᒃ, ᐊᖅᑯᓴᕆᐊᖅ ᓄᑭᖃᕐᓂᐊᖅᑐᖅ ᐱᕚᓪᓕᑎᑦᓯᓂᕐᒥᒃ ᐃᓄᐃᑦ ᐃᓅᓯᖏᓐᓂᒃ ᑭᖑᕚᕆᓄᑦ. ᐊᕐᕌᒍᕋᓵᓗᓐᓂᒃ ᐸᕐᓇᑕᐅᓯᒪᓪᓗᓂ, ᐅᓪᓗᒥ ᓇᓗᓇᐃᖅᑕᐅᕗᖅ ᒪᒥᓴᕈᑎᑦᓴᓄᑦ ᐱᓕᕆᐊᑦᓴ ᐱᔨᑦᓯᕈᑏᓪᓗ ᐋᖅᑭᓱᖅᑕᐅᓯᒪᔪᑦ ᐃᓄᓐᓄᑦ ᐃᓄᓐᓂᒃ."
ᐹᕐ ᐃᕐᖓᐅᑦ, ᐊᖓᔪᖅᑳᑉ−ᑐᒡᓕᐊ
ᓄᓇᕗᑦ ᑐᙵᕕᒃ ᑎᒥᖓ
"ᐋᓐᓂᐊᖅᑐᓕᕆᔨᒃᑯᑦ ᐱᓕᕆᕝᕕᖓ ᐊᖏᕈᑎᖃᖅᓯᒪᔪᖅ ᐱᕚᓪᓕᕈᑎᑦᓴᒥᒃ ᐃᓱᒪᒃᑯᑦ ᖃᓄᐃᙱᑦᓯᐊᕈᑎᑦᓴᖏᓐᓂᒃ ᓄᓇᕗᒻᒥᐅᑦ ᑲᑐᔾᔨᖃᑎᖃᐃᓐᓇᓂᒃᑯᑦ ᓄᓇᕗᑦ ᑐᙵᕕᒃ ᑎᒥᖓᓂᒃ, ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᐱᔨᑦᕈᑎᓂᒃ ᑲᓇᑕᒥ. ᑖᓐᓇ ᑲᑐᔾᔭᐅᔪᖅ ᓴᓇᔭᐅᓂᐊᖅᑐᓂᓗ ᐊᖅᑯᓴᕆᐊᖅ ᑎᒍᒥᐊᕐᓂᐊᖅᑐᖅ ᐃᓕᖅᑯᓯᕐᒨᖓᔪᓂᒃ ᓈᖕᒪᑦᑐᓂᒃ ᐊᐅᓚᑦᓯᔾᔪᑎᓂᒃ ᐸᖅᑭᑦᓯᓂᕐᒧᑦ ᐱᕚᓪᓕᕈᑎᒃᓴᓂᓪᓗ ᒪᒥᓴᕐᓂᕐᒧᑦ ᐃᑲᒨᑎᑦᓴᓂᒃ ᐊᖏᕐᕋᒥᓂᒃ ᖃᓂᑦᓴᓂᖅᓴᐅᓗᑎᒃ, ᐃᓄᓐᓄᑦ−ᓯᕗᓕᖅᑕᐅᔪᒥᒃ ᐊᒻᒪᓗ ᖁᐊᖅᓵᓇᖅᑐᑰᖅᓯᒪᔪᓂᒃ−ᑐᓴᐅᒪᔪᓂᒃ."
ᒥᓂᔅᑕ ᔮᓐ ᒪᐃ
ᓄᓇᕗᑦ ᒐᕙᒪᒃᑯᑦ ᐋᓐᓂᐊᖅᑐᓕᕆᔨᒃᑯᓐᓄᑦ ᒥᓂᔅᑕ
"ᐃᓄᐃᑦ ᓂᐱᖏᑎᒍᑦ ᐊᑐᓲᖏᑎᒍᓪᓗ ᐆᒻᒪᑎᒥᓃᙶᖅᑐᓂᒃ ᐊᐅᓚᑦᓯᓂᖓ, ᐊᖅᑯᓴᕆᐊᖅ ᐊᑦᑕᓇᐃᖅᓯᒪᓗᓂ ᐃᓂᑦᓴᑦᓯᐊᕙᐅᓂᐊᖅᑐᖅ ᖃᓂᑦᓴᖅᑐᓂᒃ ᐊᖏᕐᕋᒥᓂᒃ ᒪᒥᓴᕈᒪᔪᓄᑦ. ᒪᒥᓴᕐᕕᐅᒍᓐᓇᓂᐊᖅᑐᖅ ᐃᓄᐃᑦ−ᓯᕗᓕᖅᑕᖓ, ᓄᓇᓕᓐᓃᙶᖅᑐᓂᒃ ᐃᑲᔪᖅᑕᐅᔾᔪᑎᓕᒃ ᐊᒻᒪᓗ ᐸᖅᑭᔭᐅᑦᓯᐊᕐᓗᑎᒃ ᑭᒃᑯᑐᐃᓐᓇᐃᑦ ᓄᓇᕗᓕᒫᒥ. ᑖᓐᓇ ᑮᓇᐅᔭᓕᑕᐅᓯᒪᔪᖅ ᑭᒡᒍᑕᐅᔪᖅ TRC ᐊᐅᓚᔾᔭᐃᒋᐊᖁᔨᔾᔪᑎᖏᓐᓂ ᓈᓴᐅᑖ 21 ᐊᒻᒪᓗ ᓇᓗᓇᐃᒃᑲᓐᓂᕈᑎ ᒐᕙᒪᑐᖃᒃᑯᑦ ᐊᖏᕈᑎᖃᖅᓯᒪᓂᖏᓐᓂᒃ ᒪᑭᒪᔾᔪᑎᖃᖅᑎᑦᓯᓂᕐᒥᒃ ᑮᓇᐅᔭᑎᒍᑦ ᐋᖅᑭᒋᐊᕈᑎᑦᓴᓄᑦ ᐋᓐᓂᖅᑕᐅᓯᒪᔪᑦ ᐃᓕᓐᓂᐊᕆᐊᖅᑎᑕᐅᖃᑦᑕᖅᓯᒪᓂᒃᑯᑦ. ᓯᕗᓕᕐᓂᖓᒍᑦ ᑐᙵᕕᒃᑯᑦ, ᐊᒻᒪᓗ ᑲᑐᔾᔨᖃᑎᖃᕐᓂᒃᑯᑦ ᓄᓇᕗᑦ ᒐᕙᒪᖓᓂᒃ, ᖁᔭᓕᔪᖓ ᑎᒍᓯᓂᕐᒥᒃ ᑖᑦᓱᒥᖓ ᐱᖕᒪᕆᐅᔪᒥᒃ ᐊᓪᓗᕆᐊᓂᕐᒥᒃ ᑐᕌᖓᔪᒥᒃ ᓴᐃᒻᒪᖃᑎᒌᓐᓂᕐᒧᑦ."
ᒥᓂᔅᓴ ᐹᑎ ᕼᐊᔾᑐ
ᓄᓇᖃᖅᑳᖅᓯᒪᔪᓄᑦ ᐱᔨᑦᓯᕈᑕᐅᔪᓄᑦ ᒥᓂᔅᑕ
"ᐋᖅᑭᒋᐊᕈᑎᑦᓴᖅ ᐃᓱᒪᒃᑯᑦ ᖃᓄᐃᙱᑦᓯᐊᖁᓪᓗᒋᑦ ᐃᓄᐃᑦ, ᐃᖅᑲᓇᐃᔭᖃᑎᒌᒋᐊᖃᖅᑐᒍᑦ ᓴᖅᑮᓗᑕ ᐱᐅᓂᖅᓴᒥᒃ ᐊᑐᐃᓐᓇᐅᔪᒥᒃ ᐃᑲᔫᑎᒍᓐᓇᖅᑐᒥᒃ ᐸᖅᑭᑦᓯᓂᒃᑯᑦ ᐃᓕᖅᑯᓯᒃᑰᖓᔪᒥᒃ ᐊᒻᒪᓗ ᐊᖏᕐᕋᒧᑦ ᖃᓂᓐᓂᖅᓴᐅᔪᒥᒃ. ᓴᓇᔭᐅᓂᖓ ᐊᖅᑯᓴᕆᐊᖅ ᐱᖕᒪᕆᐅᔪᖅ ᐃᑲᔫᑎᑦᓴᖅ ᖃᓄᐃᙱᑦᓯᐊᕈᑎᑦᓴᖏᓐᓄᑦ ᐃᓚᒌᑦ ᐊᒻᒪᓗ ᓄᓇᓖᑦ ᒪᒥᓴᕈᒪᔪᑦ ᐅᐃᕆᓯᒪᓇᖅᑐᓄᑦ, ᖁᐊᖅᓵᓇᖅᑐᒃᑰᖅᓯᒪᔪᓄᑦ, ᐊᒻᒪᓗ ᒪᒥᓴᕐᓗᑎᒃ ᓄᓇᕗᒻᒥ. ᐊᖏᕈᑕᐅᓯᒪᔪᒃᑯᑦ ᓴᙱᓂᕐᒥᓂᒃ ᓴᕐᖓᑎᑦᓯᒋᐊᒃᑲᓐᓂᕐᓗᑎᒃ ᓄᓇᓕᑦᑎᒍᑦ ᑭᒡᒍᑕᐅᓗᓂ ᐃᓱᒪᒃᑯᑦ ᖃᓄᐃᙱᓯᐊᕐᓂᕐᒧᑦ ᐊᒻᒪᓗ ᐋᖓᔮᕐᓇᖅᑐᓄᒃ ᐊᑐᖃᑦᑕᓂᕐᒥᒃ ᐃᓘᓐᓈᒍᑦ ᒥᐊᓂᖅᓯᓯᐊᕐᓗᑎᒃ ᐃᓄᐃᑦ ᐃᓕᖅᑯᓯᖓᒍᑦ ᐊᐅᓚᑕᐅᓗᓂ ᐊᒻᒪᓗ ᐃᓅᖃᑎᒌᑦ ᐱᖕᒪᕆᐅᔪᖁᑎᖏᓐᓂᒃ."
ᒥᓂᔅᑕ ᑖᓐ ᕚᓐᑎᐅ, P.C., M.P.
ᒥᓂᔅᑕ ᐅᑭᐅᖅᑕᖅᑐᒨᖓᔪᓂᒃ, ᒥᓂᔅᑕ ᑲᒪᒋᔭᖃᖅᑐᖅ PrairiesCan ᐊᒻᒪᓗ ᑳᓐᓄᐊᑯᓐᓂᒃ
ᑐᑭᓯᒋᐊᒃᑲᓐᓂᕈᑎᑦᓴᑦ
- 2021-ᒥ, ᓄᓇᕗᑦ ᒐᕙᒪᖓ, ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᐊᒻᒪᓗ ᑲᓇᑕ ᒐᕙᒪᖓ, ᑭᒡᒐᑐᐃᓪᓗᑎᒃ ISC, ᐊᑎᓕᐅᓚᐅᖅᑐᑦ ᑲᔪᓯᑎᑦᓯᓪᓗᑎᓪᓗ ᐃᑲᔫᑎᓄᑦ ᐊᖏᖃᑎᒌᒍᑎᓂᒃ ᓴᓇᔾᔪᑎᒃᓴᒥᒃ ᐊᖅᑯᓴᕆᐊᖅ (ᑕᐃᔭᐅᒋᐊᙵᖃᑦᑕᓚᐅᖅᑐᖅ ᓄᓇᕗᒻᒥ ᒪᒥᓴᕐᕕᒃ).
- ᐆᑦᑑᑉᐱᕆ 2, 2022, ISC ᐊᑎᓕᐅᖃᑎᖃᓚᐅᖅᑐᑦ ᑐᑭᓯᐅᒪᖃᑦᑕᐅᑎᓂᕐᒧᑦ ᐊᖏᖃᑎᒌᒍᑎᒻᒥᒃ ᓄᓇᕗᑦ ᒐᕙᒪᒃᑯᖏᓐᓂᒃ ᐊᒻᒪᓗ ᓄᓇᕗᑦ ᑐᙵᕕᒃ ᑎᒥᖓᓂᒃ (ᑐᙵᕕᒃ) ᓇᓗᓇᐃᔭᐃᓯᒪᔪᓂᒃ ᐱᓕᕆᔪᑦᓴᓂᒃ, ᐱᓕᕆᐊᑦᓴᓂᒃ ᐊᒻᒪᓗ ᐊᐅᓚᑦᓯᔾᔪᑎᖏᓐᓂᒃ ᐱᓇᓱᐊᖃᑎᒌᑦᑐᓄᑦ ᑕᒪᒃᑮᓐᓄᑦ ᓴᓇᔭᐅᓂᖓᓂ ᐊᒻᒪᓗ ᐊᐅᓚᓂᕆᖓᓄᑦ ᐊᖅᑯᓴᕆᐊᖅ
- ᑲᓇᑕ ᒐᕙᒪᒃᑯᖏᑦ ᐊᖏᕈᑎᖃᓚᐅᖅᑐᑦ $42.1−ᒥᓂᔭᓂᒃ ᓴᓇᒻᒪᖓᓄᑦ ᓴᓇᔭᐅᓂᖓᓄᓪᓗ, ᓄᓇᖃᖅᑳᖅᓯᒪᔪᓄᑦ ᐱᔨᑦᓯᖅᑏᑦ ᑲᓇᑕᒥ ᐃᑲᔫᑎᖃᓚᐅᕐᒥᔪᑦ $9.7-ᒥᓕᔭᓂᒃ ᐊᕐᕌᒍᑕᒫᑦ ᐃᑲᔫᑎᖃᐃᓐᓇᕐᓗᑎᒃ ᒪᒥᓴᕐᕕᐅᑉ ᐊᐅᓚᓂᖓᓄᑦ.
- ᓄᓇᕗᑦ ᒐᕙᒪᖓ ᐊᖏᕈᑎᖃᓚᐅᖅᑐᖅ $41.6-ᒥᓂᔭᓂᒃ ᑐᕌᖓᔪᓂᒃ ᓴᓇᒻᒪᖓᓄᑦ ᓴᓇᔭᐅᓂᖓᓄᓪᓗ ᒪᒥᓴᕐᕕᒃ.
- ᓄᓇᕗᑦ ᑐᙵᕕᒃ ᑎᒥᖓ ᐊᖏᕈᑎᖃᓚᐅᖅᑐᑦ $5-ᒥᓕᔭᓂᒃ ᑐᕌᖓᔪᓂᒃ ᐃᓗᓐᓈᓄᑦ ᐱᓕᕆᐊᖅ ᐊᒻᒪᓗ $11.8-ᒥᓕᔭᓂᒃ ᒪᑭᒋᐊᖅᑕᒃᑯᑎᒍᑦ ᐃᓄᐃᑦ ᐱᓕᒻᒪᓴᕐᓂᕐᒧᑦ ᑯᐊᐳᕇᓴᓐ ᑕᓪᓕᒪᓄᑦ ᐊᕐᕌᒍᓄᑦ ᑮᓇᐅᔭᓕᖃᑦᑕᕐᓗᑎᒃ ᐃᓄᓐᓂᒃ−ᐃᓅᓯᓕᕆᓂᕐᒧᑦ ᐱᔨᑦᓯᖅᑎᐅᓂᐊᖅᑐᓂᒃ.
- ᓱᓕᔪᒥᒃ ᓴᐃᒻᒪᖃᑎᒌᓐᓂᒧᓪᓗ ᑲᒥᖏᑦ (TRC) ᐊᐅᓚᔾᔭᐃᒋᐊᕈᑕᐅᖁᓯᒪᔭᖓ ᓈᓴᐅᑖ 21 ᖃᐅᔨᒃᑲᐃᓚᐅᖅᑐᑦ ᒐᕙᒪᑐᖃᒃᑯᓐᓂᒃ ᑐᓂᓯᖁᓪᓗᒋᑦ ᒪᑭᒪᐃᓐᓇᕈᑎᑦᓴᓂᒃ ᑮᓇᐅᔭᓂᒃ ᐊᑐᖅᑕᐅᔪᓄᑦ ᐊᒻᒪᓗ ᓄᑖᓂᒃ ᓄᓇᖃᖅᑳᖅᓯᒪᔪᓄᑦ ᒪᒥᓴᕐᕕᓕᐅᖁᔨᓪᓗᑎᒃ ᐋᖅᑭᑦᓱᐃᕕᑦᓴᓂᒃ ᑎᒥᒃᑯᑦ, ᐃᓱᒪᒃᑯᑦ, ᐃᑉᐱᓐᓂᐊᓂᒃᑯᑦ ᐊᒻᒪᓗ ᑕᕐᓂᒃᑯᑦ ᐋᓐᓂᖅᑕᐅᖃᑦᑕᖅᓯᒪᔪᓄᑦ ᐃᓕᓐᓂᐊᕆᐊᖅᑎᑕᐅᖃᑦᑕᖅᓯᒪᓂᕐᓄᑦ ᓯᕗᓪᓕᐅᔾᔭᐅᖁᔨᓪᓗᑎᒃ ᓄᓇᕗᒻᒥ.
- ᐊᑐᖅᑕᐅᒋᐅᖅᑐᖅ ᑮᓇᐅᔭᓖᓂᖅ ᐊᖅᑯᓴᕆᐊᒧᑦ ᓇᓗᓇᐃᒃᑲᓐᓂᕈᑕᐅᔪᖅ ᒐᕙᒪᑐᖃᒃᑯᑦ ᑲᔪᓯᑎᑦᓯᓂᖏᓐᓂᒃ TRC ᐊᐅᓚᔾᔭᐃᒋᐊᖁᔨᔾᔪᑎᒋᓯᒪᔭᖓᓂᒃ.
ᐊᑦᑐᐊᓂᓖᑦ ᑲᓱᕈᑎᑦ
ᑐᑭᓯᒋᐊᒃᑲᓂᕐᕕᑦᓴᖅ, ᑐᓴᕋᑦᓴᓕᕆᔨᒃᑯᑦ ᖃᐅᔨᒋᐊᕐᓗᑎᒃ ᐅᕗᖓ:
ᓄᓇᕗᑦ ᒐᕙᒪᖓ
ᑖᓇᕇ ᓴᒧᕕᐅᓪ
ᑭ/ᐊᐅᓚᑦᓯᔨ ᑐᓴᐅᒪᔾᔪᑎᓕᕆᓂᕐᒧᑦ
ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ
DSommerville1@gov.nu.ca
867-975-5949
ᓄᓇᕗᑦ ᑐᙵᕕᒃ ᑎᒥᖓ
ᑭᐊᕙᓐ ᑲᑉᓗᑦᓯᐊᖅ
ᑐᓴᐅᒪᔾᔪᑎᓕᕆᓂᕐᒧᑦ ᑐᑭᒧᐊᒃᑎᑦᑎᔨ
media@tunngavik.com
867-975-4900
ᑲᓇᑕ ᒐᕙᒪᖓ
ᔨᐅᔅ ᐄᑕᓐ
ᑐᓴᕋᑦᓴᓕᕆᔨᒃᑯᓐᓂ ᑎᑎᕋᖅᑎ
ᐊᓪᓚᕝᕕᖓ ᒥᓂᔅᑕ ᓄᓇᖃᖅᑳᖅᓯᒪᔪᓕᕆᔨᒃᑯᑦ
zeus.eden@sac-isc.gc.ca
ᑐᓴᕋᑦᓴᓕᕆᔨᒃᑯᑦ
ᓄᓇᖃᖅᑳᖅᓯᒪᔪᓄᑦ ᐱᔨᑦᓯᕈᑏᑦ ᑲᓇᑕᒥ
819-953-1160
media@sac-isc.gc.ca
ᑲᓲᒪᐃᓐᓇᕆᑦ
ᐃᓚᒋᔭᐅᒋᑦ ᐅᖃᖃᑎᒌᒍᑎᒋᕙᑦᑕᑎᓐᓄᑦ ᓄᓇᖅᑳᖅᓯᒪᔪᓄᑦ ᑲᓇᑕᒥ:
ᑐᐃᑕ: @GCIndigenous
ᕙᐃᔅᐳᒃ: @GCIndigenous
ᐃᓐᑕᒍᕌᒻ: @gcindigenous
ᕙᐃᔅᐳᒃ: @GCIndigenousHealth
ᐱᖃᑦᑕᕈᒪᔪᓐᓇᖅᑐᑎᑦ ᑐᓴᕋᑦᓴᓕᐊᑦᑎᓐᓂᒃ ᐱᕙᓪᓕᐊᔪᑎᒍᑦ ᐊᒻᒪᓗ ᐅᖃᐅᓯᐅᕙᑦᑐᓂᒃ RSS−ᑯᑦ. ᑐᑭᓯᒋᐊᒃᑲᓂᕐᕕᑦᓴᖅ ᐅᕝᕙᓘᓐᓃᑦ ᐱᖃᑕᐅᖃᑦᑕᕈᒪᒍᕕᑦ, ᑕᑯᒋᐊᕐᓗᒍ www.isc.gc.ca/RSS.
- ᐅᓪᓗᖓᓂ ᐋᖅᑭᒋᐊᖅᑕᐅᔪᖅ: