ᐅᑕᖅᑭᖏᓪᓗᑎᑦ ᑲᐱᔭᐅᒋᐊᖃᕐᓂᕐᓂ: ᓄᓇᖃᖅᑳᖅᑐᑦ ᐊᒻᒪᓗ ᐃᓄᐃᑦ ᐊᖓᔪᖅᑳᕆᔭᐅᔪᑦ ᐸᖅᑭᔩᓪᓗ ᐊᑐᕈᓐᓇᖅᑕᖓ

ᓄᓇᖃᖅᑳᖅᓯᒪᔪᓄ:

ᓱᕈᓰᑦ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂ ᐱᓪᓚᕆᐅᒋᔭᐅᓂᖅᐹᖑᕗᑦ. ᐃᓚᒌᓄᑦ ᓄᓇᓕᖏᓐᓄᓪᓗ ᑲᑎᙵᑎᑦᑎᓂᖅᐹᖑᓂᖏᓐᓄᑦ. ᐃᓐᓇᕆᔭᐅᔪᑦ ᓱᕈᓯᕐᓂ ᖃᐅᔨᒪᑎᑦᑎᕗᑦ ᐱᔪᓐᓇᕐᓂᖃᖅᑐᐃᓐᓇᐅᓂᖏᓐᓂ ᑐᓂᔭᐅᓯᒪᔪᒥ ᐸᖅᑭᔨᐅᓕᖅᑎᓪᓗᒋ, ᓯᕗᓂᒃᓴᒥᓂᒡᓗ ᑕᐅᑐᙳᐊᖅᐸᓕᖅᑎᓪᓗᒋᑦ ᓄᓇᓕᖏᓐᓂ ᐊᑐᖅᐸᓛᖅᑕᒥᓂᒃ.

ᐃᓐᓇᐃᑦ ᖃᐅᔨᒪᔭᒥᖕᓂ ᐃᓅᓕᓴᐅᑎᓂ ᐊᑐᖅᑕᐅᖃᑦᑕᖅᓯᒪᔪᑐᖃᕐᓂᒃ ᐅᖃᐅᓯᖃᖅᓯᒪᕗᑦ. ᑖᒃᑯᐊ ᐃᓅᓕᓴᐅᑎᑦᑎᐊᕙᑦ ᓄᓇᖃᖅᑳᖅᑐᕕᓂᕐᓄᑦ ᐊᑐᖅᑕᐅᖃᑦᑕᖅᓯᒪᕗᑦ ᖃᓂᒻᒪᖁᔨᓇᑎᒃ ᐋᓐᓂᐊᖅᑐᓪᓗ ᐱᔪᓐᓃᖅᑎᑕᐅᓇᓱᒃᑎᓪᓗᒋᑦ.

ᑲᐱᔭᐅᖃᑦᑕᕐᓃᑦ ᐱᐅᕗᑦᑕᐅᖅ ᕿᑐᕐᖓᕐᓄ. ᓱᕈᓰᑦ ᐅᓄᖅᑐᓂ ᖃᓂᒻᒪᒍᑕᐅᓲᓂ ᓴᐳᑎᔭᐅᖃᑦᑕᕐᓂᖏᓐᓄ, ᐃᓚᖏᑦ ᐊᑦᑕᕐᓇᖅᑐᒦᑎᑦᑎᒐᔭᖅᑐᓂ ᑐᖁᔾᔪᑕᐅᔪᓐᓇᖅᑐᓂᒡᓘᓐᓃᑦ.

ᐃᓄᖕᓄᑦ:

ᐃᓄᐃᑦ ᓄᓇᖏᓐᓂ ᓱᕈᓰᑦ ᐊᓐᓂᕆᔭᐅᓂᖅᐹᖑᕗᑦ. ᐊᖓᔪᖅᑳᕆᔭᐅᔪᑦ ᐸᖅᑭᔩᓪᓗ ᐊᑦᑕᕐᓇᙱᑦᑐᒦᑎᑦᑎᑦᑕᐃᓕᒪᔭᕆᐊᖃᕐᒪᑕ ᖃᓄᐃᙱᑦᑎᐊᕐᓗᑎᒡᓗ ᕿᑐᕐᖓᕆᔭᐅᔪᑦ. ᓱᕈᓯᕐᓂ ᐸᖅᑭᑦᑎᐊᕐᓂᐅᑉ ᐃᓚᒋᕙᐅᒃ ᑲᐱᔭᐅᑎᑦᑎᖃᑦᑕᕐᓂᖅ ᖃᓂᒻᒪᖕᓇᖏᑦᑐᓂ ᐋᓐᓂᐊᕐᓇᖏᑦᑐᓂᒡᓗ.

ᐊᕐᕋᐅᒍᒐᓵᓗᖕᓂ, ᐃᓄᐃᑦ ᖃᐅᔨᒪᔭᕐᒥᓂ ᐊᑐᖅᓯᒪᕗᑦ ᖃᓂᒻᒪᒃᑕᐃᓕᒪᓇᓱᖕᓂᕐᒥ ᐃᓅᓕᓴᐅᑎᓂᒡᓗ ᐋᓐᓂᐊᖅᑕᐃᓕᒪᔾᔪᑎᓂ. ᐃᓚᖏᑦ ᓱᓕ ᐊᑐᖅᑕᐅᓲᖑᕗᑦ. ᐃᓅᓕᓴᐅᑎᑦᑎᐊᕙᐅᓂᖅᓴᖅᑕᖃᐅᓕᕐᓂᖓᓄᑦ, ᑲᐴᑏᑦ ᓴᖅᑭᑎᑕᐅᓯᒪᓕᖅᐳᑦ. ᐃᑲᔫᑕᐅᓲᖑᕗᑦ ᓱᕈᓯᕐᓄᑦ ᖃᓂᒻᒪᒃᑕᐃᓕᑎᑦᑎᓂᕐᒧ, ᐃᓚᖏᑦ ᐊᑦᑕᕐᓇᖅᑐᒦᔾᔪᑕᐅᔪᓐᓇᖅᑎᓪᓗᒋᑦ ᑐᖁᔾᔪᑕᐅᔪᓐᓇᖅᐹᓵᖕᖢᑎᒡᓗ.

ᑲᐴᑏᑦ ᐊᑦᑕᕐᓇᖏᑉᐳᑦ

ᑲᐴᑏᑦ ᐃᓅᓕᓴᐅᑎᑦᑎᐊᕙᐅᕗᑦ ᐊᑦᑕᕐᓇᖏᖦᖢᑎᒡᓗ. ᑲᓇᑕᒥᐅᑉ ᐊᑐᕆᐊᖃᖅᑕᖏᑦ ᑲᐴᑎᓕᕆᑎᓪᓗᒋ ᐱᑐᐃᓐᓇᐅᖏᑉᐳᖅ ᐊᒻᒪᓗ ᓇᐅᑦᑎᖅᓱᖅᑕᐅᖏᓐᓇᓲᖑᕗᖅ. ᐱᒋᐊᖅᖢᓂ ᑲᐴᑏᑦ ᓴᓇᔭᐅᓂᖏ ᐊᑐᖅᑕᐅᓚᐅᙱᓐᓂᓕᒫᖓᓄ ᓇᐅᑦᑎᖅᓱᖅᑕᐅᓲᖑᕗᑦ. ᐃᓚᓕᐅᔾᔭᐅᓪᓗᓂ ᖃᐅᔨᓴᖅᑕᐅᕙᓪᓕᐊᓂᖏ ᑲᐱᔭᐅᓚᐅᖅᑐᑦ ᖃᓄᐃᓕᖃᑦᑕᕐᓂᖏᓐᓂ.

ᑲᐱᔭᐅᓯᒪᖏᑦᑐᑦ ᐊᑦᑕᕐᓇᖅᑐᒦᓐᓂᖅᓴᐅᕗᑦ ᐱᓂᖅᓴᐅᓪᓗᑎᒃ ᑲᐱᔭᐅᕋᑖᖅᑑᑉ ᖃᓂᒻᒪᖕᓂᖓ. ᐱᕕᒡᔪᐊᖑᕗᖅ ᓱᕈᓰᑦ ᑲᐱᔭᐅᔭᕆᐊᖃᕐᓂᖏᑦ ᑭᖑᕙᙱᓪᓗᑎᒃ. ᓱᕈᓰᑦ ᑲᐱᔭᐅᓲᑦ ᑭᖑᕙᕐᓇᑎᒃ ᖃᓂᒻᒪᒃᑕᐃᓕᒪᔾᔪᑎᓄ ᓴᐳᑎᔭᐅᑦᑎᐊᓲᖑᕗᑦ ᑎᒥᖏᑦ. ᐃᓚᖏᑦ ᓱᕈᓰᑦ ᑲᐱᔭᐅᓚᐅᖅᑎᓪᓗᒋ ᖃᓂᒻᒪᒃᑕᐃᓕᔾᔪᑎᒥ ᐊᑑᑎᖃᒐᓛᑐᐃᓐᓇᕈᓐᓇᖅᐳᖅ. ᑖᓐᓇ ᑐᑭᖃᖅᐳᖅ ᖃᓂᒻᒪᕈᔪᑐᐃᓐᓇᕆᐊᖃᕐᓂᖏᓐᓂ ᖃᓂᒻᒪᖕᓇᖅᑐᒥ ᐊᐃᑦᑐᕐᓗᒃᑕᐅᒃᐸᑦ, ᑭᓯᐊᓂ ᐊᑦᑕᕐᓇᖅᑐᒦᓗᐊᙱᓐᓂᖅᓴᐅᒐᔭᖅᑐᖅ.

ᐊᐃᑦᑐᕐᓗᒍᑕᐅᓲᓂ ᖁᐱᕐᕈᕋᓛᓂ ᐱᑕᖃᖅᑎᓪᓗᒍ

ᓱᕈᓰᑦ ᖃᐅᔨᓇᓱᒍᒻᒪᐅᕗ ᑐᙵᓇᓲᖑᓪᓗᑎᒡᓗ. ᓇᒧᙵᑲᑕᕈᓘᔭᓲᖑᕗ ᖃᓄᓕᒫᕐᓗ ᐱᓇᓱᒍᓐᓇᖅᖢᑎᒃ. ᓱᕈᓯᐅᓂᖏᓐᓂ, ᖃᐅᑕᒫᑦ ᖃᓄᐃᓕᐅᕈᓘᔭᖅᑎᓪᓗᒋ ᓲᕐᓗ ᓴᐃᐹᖅᑭᕕᖕᒥ ᓱᕈᓯᐅᖃᑎᒥᓃᑎᓪᓗᒋᓪᓘᓐᓃ ᓄᓇᓕᖏᓐᓂ ᑲᑎᙵᕈᓘᔭᖅᑐᓃᑎᓪᓗᒋ ᓂᕆᔭᖅᑐᖃᑕᐅᓯᒪᑎᓪᓗᒋᓪᓘᓐᓃ ᐊᒃᑐᖅᓯᓲᖑᖕᒪᑕ ᐊᐃᑦᑐᕐᓗᒍᑕᐅᔪᓐᓇᖅᑐᓂ ᖁᐱᕐᕈᕋᓛᕐᓂ.

ᓱᒃᑲᔪᒥ ᐊᐃᑦᑐᕐᓗᖕᓇᖅᑐᖅ ᖁᐱᕐᕈᕋᓛᖅ ᓇᒧᙵᕈᓘᔭᕈᓐᓇᕐᒪᑦ. ᖁᐃᖅᓱᕐᓂᒃᑯᑦ, ᑕᒋᐅᕐᓂᒃᑯᑦ ᐅᖃᓪᓚᑐᐃᓐᓇᕐᓂᒃᑯᓪᓘᓐᓃ ᐊᐃᑦᑐᕐᓗᒃᑕᐅᓇᕐᒪ ᖁᐱᕐᕈᕋᓛᕐᓂ. ᐊᐃᑦᑐᕐᓗᒃᑕᐅᔪᖃᕈᓐᓇᕆᕗᖅ ᖁᐱᕐᕈᕋᓛᓂ ᑕᐃᒪᐃᑦᑐᖃᖅᑐᒥ ᓱᕈᓯᖅ ᐊᒃᑐᖅᓯᒃᐸᑦ ᐊᓱᐃᓛᒃ ᐃᔨᓕᕆᓕᕈᑎᒃ, ᓱᕐᓗᖓᓂ ᖃᓂᖓᓘᓐᓃ ᐊᒃᑐᖅᓯᓗᑎᒃ. ᐊᐃᑦᑐᕐᓗᒍᑕᐅᓲᑦ ᖁᐱᕐᕈᕋᓛᑦ ᐃᑲᕐᕋᒐᓴᖕᓂ ᐅᓪᓗᒐᓴᖕᓄᓪᓘᓐᓃ ᓇᓃᕈᓘᔭᑐᖃᕈᓐᓇᖅᐳᑦ ᓲᕐᓗ ᐹᒥ, ᐱᙳᐊᓂ, ᑭᐳᒥ ᓵᖕᓂᓪᓗ. ᐱᐅᓂᖓ ᑖᒃᑯᐊ ᖁᐱᕐᕈᕋᓛᑦ ᖃᓂᒻᒪᖕᓇᖅᑐᐃᓐᓇᐅᙱᒻᒪᑕ ᕿᑐᕐᖓᕕ ᑎᒥᖓᑕ ᐅᓇᑕᐅᑎᖏᑕ ᐅᓇᑕᕈᓐᓇᕐᒪᒋᑦ.

ᐃᓚᖏᑦ ᖃᓂᒻᒪᖕᓇᖅᑐᑦ ᐊᑦᑕᕐᓇᖅᐳᑦ. ᕿᑐᕐᖓᐃᑦ ᑲᐱᔭᐅᖃᑦᑕᕆᐊᖃᖅᐳᑦ ᑭᖑᕙᖏᓪᓗᑎᒃ ᖃᓂᒻᒪᖁᓇᒋᑦ. ᕿᑐᕐᖓᑦ ᐊᕐᕋᐅᒍᑭᓐᓂᖓᓂ ᑲᐱᔭᐅᑎᖃᑦᑕᕈᕕᐅᒃ ᖃᓂᒻᒪᖕᓇᖅᑐᒥ ᐊᖅᑯᓵᖏᓐᓂᖅᓴᐅᒐᔭᖅᐳᖅ ᒫᓐᓇ ᐃᓅᓯᓕᒫᖓᓄᓪᓗ.

ᐅᓪᓗᒥᒧᑦ ᑎᑭᖦᖢᒍ ᑲᐱᔭᐅᔭᕆᐊᖃᖃᑦᑕᕐᓂᐅᑉ ᐱᔾᔪᑎᖏ

ᐊᕐᕋᐅᒍ 50−ᐅᓕᖅᑐᑦ, ᑲᐱᔭᐅᓯᒪᔪᑦ ᖃᓂᒻᒪᖕᓇᙱᑦᑐᒧ ᐃᓅᕋᑖᕕᓃᑦ ᓱᕈᓰᓪᓗ ᖃᓄᐃᙱᓐᓂᖅᐹᕆᓯᒪᕙᖏᑦ. ᐅᓪᓗᒥ, ᐱᐅᓂᖅᓴᒦᑉᐳᒍᑦ. ᓲᖃᐃᒻᒪ ᓱᕈᓰᑦ ᑲᐱᔭᐅᖃᑦᑕᕐᓂᖏᓐᓄ ᖃᓂᒻᒪᖕᓇᖅᑐᑦ, ᓲᕐᓗ ᕿᒥᕐᓗᒥᑎᒍᑦ ᐋᓐᓂᐊᙳᖅᐸᓚᐅᖅᑐᖅ ᐱᓱᒍᓐᓇᐃᓪᓕᔾᔪᑕᐅᓪᓗᑎᒃ ᑐᖁᔾᔪᑕᐅᔪᓐᓇᖅᖢᑎᒡᓗ ᐱᑕᖃᕈᓐᓃᑲᓴᒃᑐᖅ − ᑭᓯᐊᓂ ᑕᕝᕙᐅᓪᓗᓂ ᓱᓕ.

ᑲᐱᔭᐅᓂᑰᖏᒃᑯᑎᒃ ᓱᕈᓰᑦ ᖃᓂᒻᒪᒐᔪᒃᑲᔭᖅᑐᑦ. ᑲᐱᔭᐅᑎᖃᑦᑕᕈᕕᐅᒃ ᕿᑐᕐᖓᐃᑦ, ᖃᓂᒻᒪᐅᒐᔪᒃᑐᑦ ᐱᑕᖃᙱᑎᖃᑕᐅᔾᔫᒥᔪᓐᓇᖅᐸᑎᑦ.

ᕿᑐᕐᖓᕗᑦ ᐃᒃᐱᒋᔭᑦᑎᓐᓂ ᐃᒃᐱᒍᓱᒐᔪᖕᒪᑕ. ᐃᓱᒫᓗᒃᑯᕕᑦ ᐱᖏᒐᒃᑯᕕᓪᓘᓐᓃᑦ, ᕿᑐᕐᖓᕕᑦ ᐃᒃᐱᒋᓂᐊᖅᑕᖏᑦ. ᐊᒃᑐᐊᓗᒍ, ᓇᒡᓕᒃᑐᕐᓗᒍ ᑎᒍᒥᐊᕐᓗᒍᓘᓐᓃᑦ ᑲᐱᔭᐅᕋᑖᖅᑐᕕᓂᐅᑎᓪᓗᒍ ᐊᑲᐅᓯᕚᓪᓕᕈᓐᓇᖅᑐᖅ.

ᑲᐱᔭᐅᓂᐅᕙᒃᑐᖅ ᖃᓂᒻᒪᒃᑕᐃᓕᔾᔪᑕᐅᓲᓂᒃ

ᑕᑯᓇᒍᒪᒍᕕᒋᑦ ᑲᐴᑏᑦ ᖃᓂᒻᒪᒃᑕᐃᓕᒪᔾᔪᑏᑦ: ᓱᕈᓰᑦ ᑲᐱᔭᐅᔭᕆᐊᖃᕈᑎᒋᔭᖏᑦ: ᑲᐱᔭᐅᓪᓗᓂ ᖃᓂᒻᒪᙱᔾᔪᑕᐅᓲᑦ

ᑭᓱᓂ ᖃᓄᐃᓕᑐᐃᓐᓇᕆᐊᖃᕐᓂᖏᓐᓂ ᖃᐅᔨᒪᒋᐊᖃᖅᐳᖓ?

ᓱᕈᓰᑦ ᖃᓄᐃᙱᒐᔪᒃᑐᑦ ᑲᐱᔭᐅᕋᑖᖅᖢᑎᒃ. ᑭᓯᐊᓂ, ᕿᑐᕐᖓᐃᑦ ᐃᒪᐃᑐᐃᓐᓇᕆᐊᖃᖅᐳᖅ:

• ᕿᓄᖓᓗᓂ, ᓂᕆᙳᓱᖏᓪᓗᓂ ᓯᓂᑲᑕᖕᓂᖅᓴᐅᓗᓂᓘᓐᓃᑦ (ᐱᓂᖅᓴᐅᓗᓂ ᖃᓄᐃᑦᑑᓲᖑᓂᖓᓂ)
• ᐆᑎᕐᓇᕐᓗᓂ
• ᑲᐱᔭᐅᕝᕕᒋᔭᖓ ᐊᐅᐸᕐᓗᓂ ᐳᕕᖅᓯᒪᓗᓂᓗ

ᑕᐃᒪᐃᑦᑐᖃᒐᔪᒃᑐᖅ ᑲᐱᔭᐅᔪᖃᓚᐅᖅᑎᓪᓗᒍ ᐊᑯᓂᐅᕙᖏᖦᖢᓂᓗ, ᐅᓪᓗᕐᓄ ᒪᕐᕉᓅᕈᓐᓇᖅᖢᓂ. ᐊᓂᓚᐅᖅᑎᓐᓇᑎᑦ, ᐋᓐᓂᐊᓯᐅᑎᒧ ᐊᐱᕆᔪᓐᓇᖅᐳᑎᑦ ᖃᓄᐃᑦᑕᕆᐊᖃᕐᒪᖔᖅᐱᐅᒃ ᕿᑐᕐᖓᑦ ᐃᓗᕐᕆᔾᔫᒥᖁᓪᓗᒍ.

ᖃᓄᐃᓕᖓᓕᖅᐸᑦ ᐃᑲᔪᖅᑕᐅᔪᒪᒋᐊᖃᕐᓃᑦ

ᓄᑕᕋᓛᑦ ᐃᒪᐃᓕᒍᑎᒃ, ᐋᓐᓂᐊᓯᐅᑎᒧ, ᓘᒃᑖᕐᒧᓪᓘᓐᓃᑦ ᖃᐅᔨᑎᑦᑎᑲᐅᑎᒋᔭᕆᐊᖃᖅᐳᑎᑦ:

• ᐆᑎᕐᓇᕐᓂᖓ 40°C ᐅᕝᕙᓘᓐᓃᑦ 104°F ᐅᖓᑖᓃᑉᐸᑦ
• ᖀᖅᓱᖅᐸᑦ ᐅᕝᕙᓘᓐᓃᑦ ᓴᔪᒃᑐᐊᓘᓕᖅᐸᑦ
• ᕿᐊᖏᓐᓇᑲᑕᒃᐸᑦ ᓂᕆᙳᓱᖏᑉᐸᓪᓘᓐᓃᑦ ᐃᑲᕐᕋᑦ 24 ᐅᖓᑖᓄ
• ᐳᓪᓕᖅᐸᓪᓕᐊᑐᐃᓐᓇᖅᐸᑦ ᐊᐅᐸᖅᓯᕙᓪᓕᐊᑐᐃᓐᓇᖅᐸᓪᓗ ᑲᐱᔭᐅᕝᕕᐅᓚᐅᖅᑐᖅ
• ᓯᓂᓗᐊᒪᔮᑲᑕᒃᐸᑦ ᑭᐅᒪᑦᑎᐊᙱᑲᑕᒃᐸᓪᓘᓐᓃᑦ
• ᖃᓄᐃᓐᓇᓱᒋᒍᕕᐅᒃ ᑲᐱᔭᐅᓚᐅᖅᑎᓪᓗᒍ

ᕿᑐᕐᖓᕋ ᖃᓄᖅ ᐃᑲᔪᕈᓐᓇᖅᐸᕋ?

ᑐᑭᓯᐅᒪᓗᒍ ᖃᓄᐃᓕᖓᒐᔭᕐᓂᖓ ᑲᐱᔭᐅᓚᐅᖅᑎᓪᓗᒍ ᕿᑐᕐᖓᐃᑦ ᐃᓱᒫᓗᖕᓇᖏᓐᓂᖅᓴᐅᒐᔭᖅᑐᖅ. ᐋᓐᓂᐊᓯᐅᑎ ᐊᐱᖅᓱᕋᔭᖅᑐᖅ ᕿᑐᕐᖓᖅᐱᑦ ᖃᓄᐃᑦᑑᓂᖓᓂ. ᖃᐅᔨᒪᑎᒋᐊᖃᖅᐸᑦ ᕿᑐᕐᖓᐃᑦ ᖃᓂᒻᒪᓯᖃᖅᐸᑦ ᑎᒥᒥᒍᓪᓘᓐᓃᑦ ᑭᓱᒥᒃᑭᐊᖅ ᐱᐅᒃᓴᖏᑉᐸᑦ.

ᕿᑐᕐᖓᖅᐱᑦ ᑲᐱᔭᐅᖃᑦᑕᕐᓂᖓ ᑎᒥᖓᓄᑦ ᐱᐅᕗᖅ. ᑲᐱᔭᐅᖃᑦᑕᕐᓂᕐᒥ ᖃᐅᔨᒪᓗᓂ ᖃᓄᖅᑑᕈᑎᑦᑎᐊᕙᐅᕗᖅ ᕿᑐᕐᖓᕐᓂᒃ ᖃᓂᒻᒪᖁᔨᖏᓐᓂᕐᒨᖓᔪᖅ.

ᖃᖓᒃᑯᑦ ᕿᑐᕐᖓᕋ ᑲᐱᔭᐅᔭᕆᐊᖃᖅᐸ?

ᐊᖓᔪᖅᑳᖑᓪᓗᓂ ᐸᖅᑭᔨᐅᓪᓗᓂᓘᓐᓃᑦ, ᕿᑐᕐᖓᕐᓄ ᖃᓄᐃᙱᑎᑦᑎᓇᓱᖕᓂᕐᒨᖓᕗᖅ. ᖃᐅᔨᒪᔭᕆᐊᖃᕐᓃᑦ ᕿᑐᕐᖓᕕᑦ ᖃᖓᒃᑯᑦ ᓇᓂᓪᓗ ᑲᐱᔭᐅᒋᐊᖃᕐᓂᖓ ᐱᕕᒡᔪᐊᖑᕗᖅ.

ᑲᐱᔭᐅᖃᑦᑕᕐᓂᖅ ᓈᒻᒪᓈᕐᓗᒍ ᐱᔭᐅᔭᕆᐊᖃᓪᓚᕆᒃᐳᖅ. ᑲᐱᔭᐅᓪᓗᑎᒃ ᑭᖑᕙᖏᓪᓗᓂ ᐊᑑᑎᖃᕐᓂᖅᓴᐅᓲᖑᕗᖅ; ᒥᑭᓐᓂᖏᓐᓂ ᖃᓂᒻᒪᒃᓴᕋᐃᖃᑦᑕᖅᑎᓪᓗᒋ ᒪᕐᕉᖕᓂ ᐅᑭᐅᖅᑖᕋᓱᖕᓂᓕᒫᖓᓄᑦ.

ᑎᑎᕋᖅᓯᒪᔪᓂ ᖃᖓᒃᑯ ᑲᐱᔭᐅᔭᕆᐊᖃᕐᓂᖏᓐᓂ ᐊᕐᕋᐅᒍᖏᑦ ᒪᓕᒡᓗᒋ ᖃᐅᔨᒪᔾᔪᑕᐅᔪᓐᓇᖅᐳᑦ. ᒪᓕᒡᓗᒍ ᖃᖓᒃᑯᑦ ᑲᐱᔭᐅᔭᕆᐊᖃᓕᕌᖓᑕ ᐱᐅᓂᖅᐹᖑᒐᔭᖅᐳᖅ.

ᑲᐱᔭᐅᒋᐊᖃᖅᑎᓪᓗᒋ ᖃᐅᔨᒪᓇᓱᖕᓂᖅ ᐊᔾᔨᒌᙱᓚᑦ ᓇᓕᐊᖕᓂ ᓄᓇᓕᖕᓃᑦᑐᓂ.

ᐅᑯᐊ ᓇᓗᓇᐃᒃᑯᑕᐅᕗᑦ ᖃᖓᒃᑯᑦ ᓱᕈᓰᑦ ᑲᐱᔭᐅᖃᑦᑕᕐᓂᖏᓐᓂ:

• ᒪᕐᕉᖕᓂ ᑕᖅᑭᖃᖅᑎᓪᓗᒋ
• ᑎᓴᒪᓂᒃ ᑕᖅᑭᖃᖅᑎᓪᓗᒋ
• 6−ᓂ ᑕᖅᑭᖃᖅᑎᓪᓗᒋ
• ᐊᕐᕋᐅᒍᖃᓕᖅᑎᓪᓗᒋ ᐃᑯᖓ ᖁᓕᓪᓗ ᑕᓪᓕᒪᓂᓗ ᑕᖅᑭᖃᓕᖅᑐᒧ ᑎᑭᖦᖢᒍ
• 18−ᓂ ᑕᖅᑭᖃᓕᖅᑎᓪᓗᒋ; ᐊᒻᒪᓗ
• 4−ᓂ 6-ᒧ ᐊᕐᕋᐅᒍᑖᖅᓯᒪᓕᖅᑎᓪᓗᒋ

ᐋᓐᓂᐊᓯᐅᑏᑦ ᐃᓂᓕᐅᖅᓯᒪᔭᕆᐊᖃᖅᐳᖅ ᕿᑐᕐᖓᐱ ᑲᐱᔭᐅᔭᕆᐊᖃᖃᑦᑕᕐᓂᖏᓐᓂ ᑎᑎᕋᖅᓯᒪᔪᓂ.

ᓅᓛᕈᕕᑦ ᕿᑐᕐᖓᑦ ᒥᑭᑎᓪᓗᒍ, ᑲᐱᔭᐅᖃᑦᑕᖅᓯᒪᕙᒌᕐᓗᓂ ᐊᑲᐅᓂᖅᓴᐅᕗᖅ ᑲᐱᔭᐅᔭᖅᑐᐃᓐᓇᖃᑦᑕᕐᓗᓂᓗ ᐃᓂᒃᓴᓕᐅᖅᑕᐅᔭᕌᖓᒥ. ᓅᓯᒪᓕᖅᑎᓪᓗᓯ, ᐋᓐᓂᐊᕕᖕᒧ (ᑯᐸᐃᖕᒥ ᑲᐱᔭᐅᔭᖅᑐᕐᕖᑦ ᐊᑎᖏᑦ ᐊᔾᔨᒋᙱᑦᑕᖏᑦ). ᖃᐅᔨᒪᑎᑦᑎᔭᕆᐊᖃᖅᐳᑎᑦ ᑲᐱᔭᐅᖃᑦᑕᕐᓂᐊᕐᓂᖏᓐᓂ ᑐᓴᖅᑎᑕᐅᖃᑦᑕᕐᓂᐊᕋᕕᑦ.

ᕿᑐᕐᖓᖃᖅᖢᓂ ᓄᖅᑲᖓᓐᓇᖏᑦᑐᐊᓘᔪᓐᓇᖅᐳᖅ. ᐃᓛᓐᓂᒃᑯᑦ ᕿᑐᕐᖓᐃᑦ ᑲᐱᔭᐅᔭᕆᐊᖃᖅᑎᓪᓗᒍ ᐅᐸᙱᓴᐃᓐᓇᕈᑎᑕᖃᓲᖑᕗᖅ. ᑲᐱᔭᐅᔭᕆᐊᖃᖅᑎᓪᓗᒋᑦ ᐅᐸᖃᑦᑕᐃᓐᓇᕆᐊᖃᓪᓚᑦᑖᖅᐳᑦ. ᐃᓂᒃᓴᓕᐅᑲᐅᑎᒋᔭᕆᐊᖃᖅᐳᑎᑦ ᐱᔪᓐᓇᖅᓯᑐᐊᕈᕕᑦ ᕿᑐᕐᖓᑦ ᑲᐱᔭᐅᔭᕆᐊᖃᖅᑎᓪᓗᒍ.

ᓇᒧᙵᐅᑎᔪᓐᓇᖅᐸᕋ ᕿᑐᕐᖓᕋ ᑲᐱᔭᐅᓂᐊᕐᒪᑦ?

ᐅᐸᒋᐊᖃᖅᑕᖓ ᐊᔾᔨᒌᖃᑦᑕᖏᑉᐳᖅ ᓇᓕᐊᖕᓂ ᓄᓇᖃᕐᒪᖔᑦ ᑕᑯᔭᐅᓪᓗᓂ − ᓄᓇᖃᖅᑳᖅᑐᑦ ᓄᓇᖓᓐᓂ, ᐃᓄᒋᐊᒃᑐᒦᑉᐸᑦ ᐅᕝᕙᓘᓐᓃᑦ ᓄᓇᓕᕋᓛᕐᓃᓐᓂᖅᓴᐅᒃᐸᑦ.

ᖃᐅᔨᓇᓱᒍᓐᓇᖅᐳᑎᑦ ᖃᓄᕈᓘᔭᖅ ᓇᓂ ᑲᐱᔭᐅᔭᖅᑐᕆᐊᖃᕐᒪᖔᑕ. ᐅᖃᓪᓚᖃᑎᖃᕈᓐᓇᖅᐳᑎᑦ ᐋᓐᓂᐊᓯᐅᑎᒥ ᓄᓇᓕᖕᓂ ᐅᖄᓚᕕᒋᓗᒋᓪᓘᓐᓂᑦ ᓄᓇᓕᕐᔪᐊᖑᓂᖅᓴᓂ ᐋᓐᓂᐊᖃᕐᓇᖏᑦᑐᓕᕆᓲᓂ. ᐅᖄᓚᐅᑎᒃᑯᕕᖕᒥ ᕿᓂᕐᕕᒃᓴᐅᖕᒥᔪᖅ ᐅᕝᕙᓘᓐᓃᑦ ᐃᑭᐊᖅᑭᕕᒃᑯᑦ ᐋᓐᓂᐊᕕᖕᒧ ᐅᖄᓚᐅᑎᓂ ᕿᓂᕐᓗᑎ (ᑯᐸᐃᖕᒥ ᑲᐱᔭᐅᔭᖅᑐᕐᕖᑦ ᐊᑎᖏᑦ ᐊᔾᔨᒋᙱᑦᑕᖏᑦ).

ᖃᓄᐃᒻᒪ ᑲᐱᔭᐅᑎᖃᑦᑕᕆᐊᖃᖅᑕᒃᑲ ᐅᔾᔨᖅᓱᕆᐊᖃᖅᐸᒃᑲ?

ᕿᑐᕐᖓᕐᐱᑦ ᖃᓄᐃᖏᑦᑕᕆᐊᖃᕐᓂᖓᓄ ᐱᔾᔪᑎᑦᑎᐊᕙᐅᕗᑦ ᖃᐅᔨᓴᕆᐊᖃᖃᑦᑕᕐᓂᐅᓂᖏ ᑲᐱᔭᐅᔭᕆᐊᖃᕐᓂᖏᑦ. ᓇᐅᑦᑎᖅᓱᖅᐸᒃᖢᓂ ᐃᑲᔪᕈᑎᒋᔪᓐᓇᖅᐸᑦ ᐋᓐᓂᐊᓯᐅᑎᓄ ᑎᑎᕋᖅᑕᐅᓯᒪᔭᕆᐊᖃᕐᓂᖏ ᑲᐱᔭᐅᖃᑦᑕᕆᐊᖃᕐᓂᖏᓪᓗ ᐊᓂᒍᓚᐅᖅᑎᓐᓇᒍ ᑲᐱᔭᐅᕝᕕᖓ.

ᐋᓐᓂᐊᓯᐅᑎᒧᑦ ᑕᑯᔭᐅᕐᖓᐅᑎᖓ ᑲᐱᔭᐅᖃᑦᑕᖅᓯᒪᔪᓂ ᑎᑎᕋᖅᓯᒪᔪᖅ ᐱᔪᒪᓗᒋᑦ. ᐳᐃᒍᖅᑕᐃᓕᓗᒋᑦ ᕿᑐᕐᖓᕕᑦ ᑲᐱᔭᐅᓂᕆᖃᑦᑕᖅᑕᕕᓂᖏᑦ ᑎᑎᕋᖅᑕᐅᕙᓪᓕᐊᔭᕆᐊᖃᕐᓂᖏᓐᓄ.

ᑲᐱᔭᐅᓯᒪᔭᖏᑕ ᑎᑎᖅᑲᖏᑦ ᓇᓗᓇᐃᖅᓯᒪᔪᑦ ᐅᑯᓄᖓ ᐊᑐᖅᑕᐅᔪᓐᓇᖅᐳᑦ:

• ᐃᓕᓐᓂᐊᕆᐊᕐᓂᐊᓕᖅᑎᓪᓗᒍ
• ᐊᓯᐊᓄ ᐃᓕᓐᓂᐊᕐᕕᖕᒧᐊᖅᑕᐅᒃᐸᑦ
• ᓇᔪᑲᐃᓐᓇᖅᑕᖓᓂ ᐃᓕᓐᓂᐊᙱᑎᓪᓗᒋ
• ᓄᓇᓕᖓᑦᑕ ᐊᓯᐊᓅᖅᑎᓪᓗᒍ ᐋᓐᓂᐊᕕᓕᐊᕈᓂ
• ᐊᐅᓪᓚᕈᓂ ᑲᓇᑕᐅᑉ ᓯᓚᑖᓄ
• ᐊᓯᐊᓄᑦ ᓄᓇᓕᖕᒧ ᓅᒃᑯᑎᒃ
• ᓄᑖᕐᒥᒃ ᐋᓐᓂᐊᓯᐅᑎᑖᖅᐸᑦ

ᑲᐱᔭᐅᔭᕆᐊᖃᖅᐹ ᕿᑐᕐᖓᕋ?

ᓄᓇᓖᑦ ᐊᕕᒃᑐᖅᓯᒪᔪᑦ ᐊᔾᔨᒌᖏᑦᑐᓂ ᒪᓕᒐᕋᓛᖃᐅᖅᐳᑦ ᑲᐱᔭᐅᖃᑦᑕᖅᑐᓂ ᖃᓂᒻᒪᖕᓇᖏᑦᑐᒧ ᐅᖃᐅᓯᖃᖅᑐᓂ. ᓄᓇᓖᑦ ᐊᕕᒃᑐᖅᓯᒪᔪᑦ ᑲᐱᔭᐅᓯᒪᖁᔨᓲᖑᕗᑦ ᐸᐃᕆᕕᖕᒨᓚᐅᖅᑎᓐᓇᒋᑦ ᒥᑭᓛᓂᓪᓘᓐᓃᑦ ᐃᓕᓐᓂᐊᖃᑕᐅᓚᐅᖅᑎᓐᓇᒋᑦ. ᐋᓐᓂᐊᓯᐅᑎᓂ ᐊᐱᖅᓱᕈᓐᓇᖅᐳᑎᑦ ᑐᑭᓯᒋᐊᒃᑲᓐᓂᕈᒪᒍᕕᑦ.

ᓄᓇᒋᔭᑦ ᑲᐱᔭᐅᔭᕆᐊᖃᖃᑦᑕᕐᓃᓪᓗ ᖃᓂᒻᒪᒃᑕᐃᓕᔾᔪᑎᓂ

ᑲᐱᔭᐅᖃᑦᑕᖅᐸᑕ ᓱᕈᓰᑦ ᖃᓄᐃᙱᑦᑕᐃᓕᒪᓂᕐᒥ ᓄᓇᓕᖕᓂ ᑕᑯᔭᐅᒐᔭᖅᐳᖅ. ᐅᖃᐅᓯᕆᒍᕕᒋᑦ ᐃᓚᖕᓄᑦ ᐱᖃᓐᓇᕆᔭᕐᓄᓪᓗ ᐊᖓᔪᖅᑳᕆᔭᐅᔪᑦ ᕿᑐᕐᖓᒥᓂᒃ ᑲᐱᔭᐅᑎᑦᑎᔪᒪᓕᕋᔭᕐᒥᕗᑦ.

ᑲᐱᔭᐅᑎᑦᑎᖃᑦᑕᕐᓂᖅ ᖃᓂᒪᓇᙱᑦᑐᒧ ᐊᐃᑦᑐᕐᓗᒃᓯᔪᖃᙱᓐᓂᖅᓴᐅᓕᕋᔭᖅᐳᖅ ᓄᓇᓕᖕᓂ. ᑖᓐᓇ ᑐᑭᖃᖅᑐᖅ ᓄᓇᓕᖕᒥᐅᖃᑎᑎ ᐊᐃᑦᑐᕐᓗᖕᓇᖅᑐᓂ ᖃᓂᒻᒪᒃᑎᑦᑕᐃᓕᒪᒐᔭᖅᑕᑎᑦ. ᓄᓇᓕᖕᓂ ᐅᓄᕐᓂᖅᓴᐃᑦ ᑲᐱᔭᐅᖃᑦᑕᖅᐸᑕ, ᖃᓂᒻᒪᖕᓇᖅᑐᓂᒃ ᐱᑕᖃᙱᑎᑦᑎᔪᓐᓇᖅᐳᖅ ᐊᒻᒪᓗ ᓄᓇᓕᖕᒥᐅᑦ ᖃᓄᐃᙱᑦᑎᐊᕈᓐᓇᖅᐳᑦ ᓴᙱᓗᑎᒡᓗ.

ᐃᓂᒃᓴᓕᐅᕐᓂᐊᕐᓗᒍ

• ᓯᕗᓪᓕᖅᐸᒥ ᑕᖅᑭᖃᖅᑎᓪᓗᒍ ᒪᕐᕉᖕᓂ ᑲᐱᔭᐅᑎᑦᑐᓐᓇᖅᑕᐃᑦ ᖃᓂᒻᒪᖕᓇᖏᑦᑐᒧᑦ, ᑭᓯᐊᓂ ᐋᓐᓂᐊᓯᐅᑎ ᐃᓂᒃᓴᓕᐅᖅᑳᓚᐅᖅᑎᓪᓗᒍ ᕿᑐᕐᖓᕐᓄᑦ.

ᓇᒃᓴᕐᓗᑎ ᑎᑎᕋᖅᓯᒪᔪᓂᒃ ᖃᖓᒃᑯᑦ ᑲᐱᔭᐅᓂᕕᓂᖏᓐᓂ ᓇᓗᓇᐃᖅᓯᓯᒪᔪᓂ

• ᓄᑕᕋᓛᖅᐱᑦ ᑲᐱᔭᐅᓂᕕᓂᖏᓐᓂ ᑎᑎᕋᖅᓯᒪᔪᓂ ᖃᐃᑦᑎᔭᐅᒐᔭᖅᑐᑎᑦ ᓯᕗᓪᓕᖅᐹᒥ ᐃᓂᒃᓴᓕᐅᖅᑕᐅᓯᒪᑎᓪᓗᒍ.

ᐃᓂᒃᓴᓕᐅᒃᑲᓐᓂᕐᓗᒍ ᑭᖑᓪᓕᕐᒧ

• ᐊᓂᓚᐅᖅᑎᓐᓇᑎᑦ ᐋᓐᓂᐊᕕᖕᒥ (ᑯᐸᐃᖕᒥ ᑲᐱᔭᐅᔭᖅᑐᕐᕖᑦ ᐊᑎᖏᑦ ᐊᔾᔨᒋᙱᑦᑕᖏᑦ). ᐃᓂᒃᓴᓕᐅᖅᓯᒪᒌᕐᓗᒍ ᑭᖑᓪᓕᕐᒧ.

ᐅᓪᓗᖅᓯᐅᑎᒧ ᑎᑎᕋᕐᓗᒍ ᑲᐱᔭᐅᕝᕕᒃᓴᖓ

• ᑎᑎᕋᕐᓗᒍ ᐳᐃᒍᔾᔭᐃᕐᓂᐊᕋᕕᐅᒃ.

ᑎᑎᕋᖅᓯᒪᔪᑦ ᑲᐱᔭᐅᓂᕕᓂᖏᑦ ᓇᒃᓴᕐᓗᒋᑦ ᐋᓐᓂᐊᕕᖕᒧ

• ᑐᖅᑯᕐᓗᒋᑦ ᓇᓂᑲᐅᑎᒋᔪᓐᓇᕐᓂᐊᕋᕕᒋᑦ ᐱᔭᕆᐊᖃᓕᕈᕕᒋᑦ.