ᐳᕙᓪᓗᖕᓂᖅ ᒪᒥᑕᐅᔪᖕᓇᖅᑐᖅ
ᐳᕙᓪᓗᖕᓂᐅᑉ ᒥᒃᓵᓄᑦ ᑐᑭᓯᒋᐊᕈᑎᒃᓴᑦ
ᐳᕙᓪᓗᖕᓂᖅ ᓱᓇᐅᕙ?
ᑯᒪᕈᓯᖅ Mycobacterium tuberculosis ᐳᕙᓪᓗᒍᑕᐅᓕᖅᐸᒃᑐᖅ.
ᖃᓄᖅ ᐳᕙᓪᓗᓕᕈᖕᓇᖅᐳᖓ?
ᑭᓇᑭᐊᖅ ᑐᓂᔭᐅᔪᖕᓇᖅᑐᕐᒥᒃ ᐳᕙᓪᓗᖕᓂᖃᕈᓂ, ᐋᓐᓂᐊᓕᕈᑕᐅᔪᖕᓇᖅᑐᑦ ᐳᕙᖏᓐᓃᑦᑐᑦ ᐊᓂᖅᓵᕐᕕᖏᓐᓂᒡᓘᓐᓃᑦ ᐊᓯᖏᓐᓄᑦ ᑐᓂᔭᐅᔪᖕᓇᖅᑐᑦ ᖃᓪᓚᒃᑐᕈᑎᒃ, ᑕᒋᐅᒃᑐᕈᑎᒃ, ᐅᖃᓪᓚᒍᑎᒃ ᐃᙱᕈᑎᒡᓘᓐᓃᑦ. ᑖᒃᑯᐊ ᐋᓐᓂᐊᓕᕈᑕᐅᔪᖕᓇᖅᑐᑦ ᐃᓗᒻᒧᑦ ᐊᓂᖅᓵᕆᓐᓂᕈᖕᓂ, ᑕᐃᒪ ᑐᓂᔭᐅᓯᒪᓕᖅᐳᑎᑦ.
ᖃᓄᕐᓕ ᐋᓐᓂᐊᓕᕈᑕᐅᔪᖕᓇᖅᑐᑦ ᐳᕙᖕᓃᓕᕐᓂᕈᑎᒃ?
ᓇᓕᐊᒃᑭᐊᖅ ᐱᖓᓱᑦ ᐊᔾᔨᒌᙱᑦᑐᑦ ᓴᖅᑭᓕᕋᔭᖅᑐᑦ:
- ᑎᒥᕕᑦ ᐋᓐᓂᐊᖅᑕᐃᓕᔾᔪᑎᖓ ᑐᖁᑎᕆᓗᓂ ᐳᕙᓪᓗᓕᕈᑕᐅᔪᖕᓇᖅᑐᕐᒥᒃ ᐋᓐᓂᐊᓕᙱᓂᖅᓴᐅᓕᕐᓗᑎᑦ ᐅᕝᕙᓘᓐᓃᑦ …
- ᐳᕙᓪᓗᖕᓇᖅᑐᖃᓕᕐᓗᑎᑦ ᑭᓯᐊᓂ ᑎᒥᕕᑦ ᐋᓐᓂᐊᓕᖅᑕᐃᓕᔾᔪᑎᖓᓄᑦ ᖃᓄᐃᓕᐅᖅᑎᑕᐅᑦᑕᐃᓕᓗᓂ ᑎᒥᕕᑦ ᐃᓗᐊᓂᑦ ᐅᕝᕙᓘᓐᓃᑦ …
- ᐳᕙᓪᓗᖕᓇᖅᑐᖃᓕᕐᓗᑎᑦ ᐋᓐᓂᐊᓕᕈᑎᒋᓕᕐᓗᒍᓗ ᐳᕙᓪᓗᓕᕐᓗᑎᑦ — ᐳᕙᓪᓗᓕᓪᓚᑦᑖᒍᖕᓇᖅᑐᑎᑦ ᑎᒥᖕᓄᑦ ᐃᑎᖅᓯᒪᓕᓵᖅᑎᓪᓗᒍ (ᓲᕐᓗ ᐱᓇᓱᐊᕈᓰᑦ ᑕᖅᑮᓪᓘᓐᓃᑦ ᐃᓗᐊᓐᓂᑦ) ᐅᕝᕙᓘᓐᓃᑦ ᐅᑭᐅᑦ ᖃᔅᓯᑐᐃᓐᓇᐃᑦ ᖄᖏᖅᓯᒪᓕᕈᑎᒃ.
ᐳᕙᓪᓗᖕᓂᖃᕈᒪ, ᐃᓚᓐᓈᓐᓄᑦ ᐃᓚᒋᔭᓐᓄᓪᓗ ᑐᓂᔪᖕᓇᖅᐸᕋ?
ᐳᕙᓪᓗᖕᓂᖅ ᖃᓄᐃᓕᐅᖅᑎᑕᐅᑦᑕᐃᓕᓯᒪᒍᓂ ᑎᒥᖕᓄᑦ ᑐᓂᔪᖕᓇᖏᑦᑕᑦ ᐊᖏᖕᓄᑦ.
ᐳᕙᓪᓗᓪᓚᑦᑖᕐᓂᖅ ᑐᓂᔪᖕᓇᖅᑕᑦ ᐊᓯᖏᓐᓄᑦ ᖃᓪᓚᖕᓂᒃᑯᑦ, ᑕᒋᐅᒃᑐᕐᓂᒃᑯᑦ, ᐅᖃᓪᓚᖕᓂᒃᑯᑦ ᐅᕝᕙᓘᓐᓃᑦ ᐃᙱᕐᓂᒃᑯᑦ ᐳᕙᓪᓗᖕᓇᖅᑐᖅ ᐳᕙᖕᓃᓐᓂᕈᓂ ᐅᕝᕙᓘᓐᓃᑦ ᐊᓂᖅᓵᕈᑎᖕᓃᓐᓂᕈᓂ. ᐳᕙᓪᓗᖕᓇᖅᑐᕐᒥᒃ ᑐᓂᓯᔪᖕᓇᖏᑦᑐᑎᑦ ᑎᒎᑎᓂᒃᑯᑦ ᐅᕝᕙᓘᓐᓃᑦ ᐃᒥᕐᕕᖕᓂᒃ ᓂᕆᔾᔪᑎᓂᒡᓘᓐᓃᑦ ᐊᑐᖅᑕᕐᓂᒃ ᐊᓯᖕᓄᑦ ᐊᑐᖅᑕᐅᒍᑎᒃ. ᐋᓐᓂᐊᓕᕈᑕᐅᔪᖕᓇᖅᑐᑦ ᑎᒥᐅᑉ ᐃᓗᐊᓂᑦ ᐃᖏᕐᕋᔪᖕᓇᖅᑐᑦ ᐋᓐᓂᐊᓕᕈᑎᒋᓕᕐᓗᖕᓂᓗ ᑭᓯᐊᓂ ᐳᕙᖕᓃᒍᒪᓂᖅᓴᐅᕙᒃᑐᑦ ᐳᕙᓪᓗᒡᓕᖅᑎᑦᑎᓕᕐᓗᑎᒃ.
ᖃᓄᖅ ᐃᒃᐱᒋᓂᐊᖅᐳᖓ ᐳᕙᓪᓗᖕᓇᖅᑐᖃᕈᒪ?
ᐳᕙᓪᓗᖕᓇᖅᑐᖃᕈᕕᑦ ᖃᓄᐃᓕᐅᖅᑎᑕᐅᑦᑕᐃᓕᓯᒪᔪᒥᒃ, ᑎᒥᕕᑦ ᐃᓗᐊᓃᒃᑯᓗᐊᕐᓗᓂ ᐋᓐᓂᐊᓕᕈᑎᒋᓚᙱᑦᑕᑦ.
ᐳᕙᓪᓗᓪᓚᑦᑖᓕᕈᕕᑦ, ᐋᓐᓂᐊᓕᕈᑎᒋᓂᐊᖅᑕᑦ ᓇᓗᓇᙱᓂᖅᓴᐅᔪᖅ ᓲᕐᓗ ᖃᐅᔨᓐᓇᕐᓗᓂ ᐃᒫᒃ:
- ᖁᐃᖅᑐᐃᓐᓇᓕᕈᕕᑦ ᒪᕐᕉᖕᓂᒃ ᐱᓇᓱᐊᕈᓰᖕᓂᒃ ᐅᖓᑕᓅᓪᓗᓐᓃᑦ
- ᖃᓪᓚᒃᑐᕌᖓᕕᑦ ᖃᐅᖅᓯᖃᑦᑕᕐᓗᑎᑦ
- ᐃᓛᓐᓂᒃᑯᑦ ᖃᓪᓚᒃᑐᕌᖓᕕᑦ ᐊᐅᖑᖃᑦᑕᕐᓗᓂ
- ᓴᙲᓕᓯᒪᔫᔭᕐᓗᑎᑦ ᐅᕝᕙᓘᓐᓃᑦ ᑕᖃᒻᒪᕆᒡᓗᑎᑦ
- ᑳᙱᓗᑎᑦ
- ᐅᕿᒡᓕᕙᓪᓕᐊᓗᑎᑦ
- ᐆᓇᖅᓯᓯᒪᓗᑎᑦ
- ᐅᓐᓄᐊᒃᑯᑦ ᐃᐱᓕᖃᑦᑕᕐᓗᑎᑦ ᖃᐅᓯᖃᑦᑕᕐᓗᑎᑦ
- ᓴᖅᑲᕐᓗᒡᓗᑎᑦ
ᓇᓕᐊᖕᓂᑐᐃᓐᓇᖅ ᑕᒪᒃᑯᓂᖓᑦ ᐋᓐᓂᐊᕈᑎᖃᕈᕕᑦ, ᐋᓐᓂᐊᕐᕕᓕᐊᕐᓗᑎᑦ ᖃᐅᔨᓴᖅᑕᐅᒋᑦ.
ᖃᓄᖅ ᖃᐅᔨᒪᓂᐊᖅᐳᖓ ᐳᕙᓪᓗᖕᓂᖃᕈᒪ?
ᒪᑯᐊ ᐳᕙᓪᓗᖕᓂᖃᙱᒃᑲᓗᐊᕐᒪᖔᖅᐲᑦ ᖃᐅᔨᓴᕈᑕᐅᕙᒃᑐᑦ:
- ᐋᓐᓂᐊᖅᑐᓕᕆᔭᐅᖃᑦᑕᖅᓯᒪᓂᑎᑦ (ᐱᓗᐊᖅᑐᒥᒃ ᐳᕙᓪᓗᐊᒃᑐᓕᕆᔭᐅᓯᒪᓂᑎᑦ)
- ᐋᓐᓂᐊᕈᑎᒋᔭᑎᑦ ᖃᐅᔨᓴᖅᑕᐅᓗᑎᒃ
- ᐅᕕᓂᒃᑯᑦ ᕿᓯᒃᑯᑦ ᖃᐅᔨᓴᖅᑕᐅᓗᑎᑦ ᐳᕙᓪᓗᙱᒃᑲᓗᐊᕐᒪᖔᖅᐲᑦ
- ᓴᖅᑲᒃᑯᑦ ᐊᔾᔨᓕᐅᖅᑕᐅᓗᑎᑦ
- ᖃᓪᓚᒃᑐᕐᓗᓂ ᖃᐅᖅᓯᓃᑦ ᓯᖅᑮᓪᓘᓐᓃᑦ ᖃᐅᔨᓴᖅᑕᐅᓗᓂ
ᑕᒪᒃᑯᐊᓕᒫᑦ ᐃᓚᐃᓐᓇᖏᓪᓘᓐᓃᑦ ᖃᐅᔨᓴᖅᑕᐅᓂᖏᑦ ᖃᐅᔨᒪᓕᖅᑎᑦᑎᓂᐊᖅᑐᑦ ᐋᓐᓂᐊᖅᑐᓕᕆᔨᒥᒃ ᐳᕙᓪᓗᖕᓇᖅᑐᖃᕐᒪᖔᖅᐲᑦ ᐅᕝᕙᓘᓐᓃᑦ ᐳᕙᓪᓗᓪᓚᑦᑖᕐᒪᖔᖅᐲᑦ.
ᖃᓄᖅ ᐊᒻᒪᓗ ᓱᓇᐅᕙᑦ ᐳᕙᓪᓗᖕᓇᖅᑐᖅᑖᕈᑎᒋᓗᐊᕈᖕᓇᖅᑕᒃᑲ?
ᑕᐃᒃᑯᐊ ᐳᕙᓪᓗᓪᓚᑦᑖᓕᕋᔪᖕᓇᖅᓴᐅᔪᑦ ᐃᒪᐃᑦᑑᔪᑦ:
- ᐳᕙᓪᓗᖕᓇᖅᑐᖃᕐᓂᖏᓐᓂᒃ ᖃᐅᔨᔭᐅᓵᓚᐅᖅᑐᑦ (ᐱᓗᐊᖅᑐᒥᒃ 2 ᐅᑭᐅᑦ ᖄᖏᖅᑐᑦ ᐃᓗᐊᓂᑦ)
- ᓄᑕᕋᑦ (ᐱᓗᐊᖅᑐᒥᒃ 5 ᐊᑖᓂᑦ ᐅᑭᐅᓖᑦ)
- ᐳᕙᓪᓗᓪᓚᑦᑖᓚᐅᖅᑐᑦ ᒪᒥᓴᖅᑕᐅᑦᑎᐊᙱᓚᐅᖅᖢᑎᒡᓗ ᐅᕝᕙᓘᓐᓃᑦ ᒪᒥᓴᖅᑕᐅᓚᐅᖅᑐᑦ 1970-ᖏᑦ ᑎᑭᓚᐅᙱᑎᓪᓗᒋᑦ ᓱᓕ
- ᐄᔭᕋᖅᐸᒃᑐᑦ ᑎᒥᐅᑉ ᐋᓐᓂᐊᖅᑕᐃᓕᔾᔪᑎᖓᓂᒃ ᓴᙲᓕᖅᑎᑦᑎᕙᒃᑐᓂᒃ
- ᑕᐃᒃᑯᐊ ᐊᓯᖏᓐᓂᒃ ᐋᓐᓂᐊᕈᑎᖃᖅᑐᑦ ᓲᕐᓗ:
- ᐊᓴᐱᒃᓴᖅ/ᐊᓴᐱ
- ᐊᓯᐊᓂᒃ ᑎᒥᐅᑉ ᐃᓚᖓᓂᒃ ᑐᓂᔭᐅᓯᒪᔪᑦ
- ᑕᖅᑐᓪᓗᒃᑐᑦ
- ᐃᓚᖏᑦ ᑳᓐᓴᑦ ᐊᒻᒪᓗ ᑳᓐᓴᓂᒃ ᑐᖁᓴᐅᑎᑦ
- ᓱᑲᖃᓗᐊᕐᓂᖅ
- ᐅᕿᓗᐊᕐᓂᖅ
ᖃᓄᖅ ᐳᕙᓪᓗᖕᓂᖅ ᒪᒥᓴᖅᑕᐅᕙᒃᐸ?
ᐳᕙᓪᓗᖕᓇᖅᑐᖃᕈᕕᑦ (ᖃᓄᐃᓕᐅᖅᑎᑕᐅᑦᑕᐃᓕᓯᒪᔪᒥᒃ), ᐄᔭᒐᖅᑎᑕᐅᔪᖕᓇᖅᑐᑎᑦ antibiotic-ᓂᒃ ᐳᕙᓪᓗᓪᓚᑦᑖᓕᖅᑎᑕᐅᑦᑕᐃᓕᒐᓱᒡᓗᑎᑦ. ᐃᔭᒐᖅᑎᑕᐅᔪᖕᓇᖅᑐᑦ 9 ᑕᖅᑭᕐᓄᑦ. ᐱᒻᒪᕆᐅᔪᖅ ᑕᒪᑦᑎᐊᕐᒥᒃ ᐄᔭᒐᒃᓴᑎᑦ ᐊᑐᑦᑎᐊᓗᒃᑖᕐᓗᒋᑦ.
ᐳᕙᓪᓗᓪᓚᑦᑖᕈᕕᑦ, ᐄᔭᒐᖅᑎᑕᐅᔭᕆᐊᖃᖅᑐᑎᑦ antibiotic-ᓂᒃ ᑐᖁᑎᖅᑕᐅᓗᒃᑖᕐᓗᑎᒃ ᐳᕙᓪᓗᖕᓇᖅᑐᓕᒫᑦ ᒪᒥᑕᐅᒻᒪᕆᒡᓗᑎᑦ ᐳᕙᓪᓗᖕᓂᕐᒥᒃ. ᐄᔭᒐᖅᑎᑕᐅᔪᖕᓇᖅᑐᑎᑦ ᑕᖅᑭᕐᓄᑦ 6-ᓂᑦ 9-ᒧᓪᓘᓐᓃᑦ.
ᐳᕙᓪᓗᖕᓂᕐᒧᑦ ᐄᔭᒐᑦ ᑐᓂᔭᐅᕙᖕᓂᖅᓴᐅᔪᑦ ᐃᓕᓐᓂᐊᖅᑎᑕᐅᓯᒪᔪᕐᒧᑦ ᐋᓐᓂᐊᖅᑐᓕᕆᔨᒧᑦ ᐃᓕᖕᓂᒃ ᖃᐅᔨᓴᑦᑎᐊᕐᓗᓂ ᑕᐅᑐᖃᑦᑕᕐᓗᓂᓗ ᐄᔭᒐᖅᑐᖅᑎᓪᓗᑎᑦ.
ᓱᓕᔪᖅ: ᐄᔭᒐᖅᑐᕈᖕᓇᐃᕈᕕᑦ ᐱᔭᕇᙱᑎᓪᓗᒋᑦ ᓱᓕ ᐅᕝᕙᓘᓐᓃᑦ ᐄᔭᒐᙱᑦᑎᐊᒻᒪᕆᒃᑯᕕᑦ, ᓴᙱᓂᖅᓴᕐᒥᒃ ᐳᕙᓪᓕᓗᕈᖕᓇᖅᑐᑎᑦ. ᑕᐃᒪᓕᕐᓂᕈᓂ ᑕᐃᒃᑯᐊ ᐊᑲᐅᓂᖅᐹᑦ ᐳᕙᓪᓗᖕᓂᕐᒥᒃ ᒪᒥᓴᐅᑎᑦ ᐄᔭᒐᑦ ᓱᕚᓪᓗᕈᑕᐅᔪᐃᖕᓇᐃᓕᕈᖕᓇᖅᑐᑦ. ᐄᔭᒐᕐᒧᑦ ᑐᖁᑎᖅᑕᐅᔪᖕᓇᖏᑦᑐᖅ ᐳᕙᓪᓗᖕᓇᖅᑐᖃᓕᕐᓗᓂ. ᑕᐃᒪᐃᑦᑐᑦ ᐊᔪᕐᓇᕐᓂᖅᓴᒻᒪᕆᐅᔪᑦ ᒪᒥᓴᕆᐊᒃᓴᖅ.
ᖃᓄᐃᓕᐅᕈᖕᓇᖅᐳᖓ?
ᐋᓐᓂᐊᖅᑐᓕᕆᔨᒥᒃ ᐅᖃᖃᑎᖃᕐᓗᑎᑦ ᐳᕙᓪᓗᖕᓇᖅᑐᖃᓕᕈᖕᓇᕐᓂᕐᓂᒃ.
ᐅᔾᔨᖅᑐᑦᑎᐊᕐᓗᑎᑦ ᐳᕙᓪᓗᖕᓂᕐᒥᒃ – ᖃᐅᔨᒪᒋᐊᕐᓗᒋᑦ ᐋᓐᓂᐊᕐᓃᑦ ᖃᐅᔨᓐᓇᕈᑕᐅᔪᖕᓇᖅᑐᑦ ᐳᕙᓪᓗᖕᓂᕐᒥᒃ ᐊᒻᒪᓗ ᓇᖕᒥᓂᖅ ᐊᓯᖕᓂᓪᓗ ᐅᔾᔨᖅᑐᑦᑎᐊᕐᓗᑎᑦ.
ᐳᕙᓪᓗᖕᓂᖅ ᖃᐅᔨᔭᐅᑲᐅᑎᒋᒍᓂ ᒪᒥᓴᖅᑕᐅᓗᓂᓗ, ᐊᓯᖏᓐᓄᑦ ᑐᓂᙱᓂᖅᓴᐅᓕᕈᖕᓇᖅᑕᑦ ᐊᒻᒪᓗ ᒪᒥᑦᑎᐊᒻᒪᕆᒍᓐᓇᕐᓂᖅᓴᐅᓗᑎᓪᓗ.
ᐳᕙᓪᓗᖕᓂᐅᑉ ᒥᒃᓵᓄᑦ ᑐᑭᓯᐊᔭᕐᓂᒃ ᖃᐅᔨᒪᔭᕐᓂᒃ ᐅᖃᐅᓯᖃᖃᑦᑕᕐᓗᑎᑦ ᐃᓚᒋᔭᕐᓄᑦ, ᐃᓕᓐᓂᐊᕐᕕᖕᓂᑦ, ᐊᒻᒪᓗ ᓇᓂᑐᐃᓐᓇᖅ ᓄᓇᓕᖕᒥᐅᖃᑎᖕᓄᑦ.
ᐳᕙᓪᓗᖕᓂᕐᒧᑦ. ᐳᕙᓪᓗᖕᓂᖅ ᐊᒃᑐᐃᔪᖕᓇᖅᑐᑦ ᑭᓇᑐᐃᓐᓇᑦᑎᐊᕐᒥᒃ, ᓇᓂᑐᐃᓐᓇᑦᑎᐊᕐᓗ – ᓈᒻᒪᑦᑎᐊᖅᑐᑦ ᐄᔭᒐᐃᑦ ᐃᑲᔪᕈᑎᒃᓴᓪᓗ ᒪᒥᓴᕈᑕᐅᔪᖕᓇᖅᑐᑦ ᐳᕙᓪᓗᖕᓂᕐᒥᒃ.
ᐳᕙᓪᓕᖕᓂᖅ ᓄᖅᑲᖅᑎᓚᐅᖅᑎᒍᑦ
- ᐅᓪᓗᖓᓂ ᐋᖅᑭᒋᐊᖅᑕᐅᔪᖅ: